बाढी प्रभावित ऋणीलाई राहत, असोजको किस्ता पुससम्म सार्न सकिने

काठमाण्डौ । भोटेकोशी र बुढीगण्डकीको बाढीले कारोबार तथा आम्दानी प्रभावित भएका ऋणीलाई नेपाल राष्ट्र बैंकले कर्जा भुक्तानीमा सहुलियत दिएको छ । असोज मसान्तमा तिर्नुपर्ने साँवा र/वा ब्याजको किस्ता पुस मसान्तसम्म सार्न सकिने व्यवस्था गरिएको हो ।

राष्ट्र बैंकले असोज २७ गते जारी गरेको परिपत्रअनुसार बाढीबाट प्रत्यक्ष प्रभावित उद्यम, परियोजना तथा व्यवसायसँगै रसुवा भन्सार नाकाबाट हुने आयात–निर्यातमा आधारित प्रभावित व्यवसायले पनि सुविधा पाउन सक्नेछन् । Bhotekoshi1

तर, यस्तो सुविधा स्वतः लागू हुनेछैन । बैंक तथा वित्तीय संस्थाले ऋणीको बिक्री, आम्दानी, नगद प्रवाह, जगेडा रकम, आयात–निर्यातमा परेको असर र कर्जा सदुपयोगिताको विश्लेषण गर्नुपर्नेछ । त्यसबाट किस्ता तिर्न कठिनाइ देखिएका ऋणीको भुक्तानी अवधि थप गर्न सकिनेछ ।

‘क’, ‘ख’ र ‘ग’ वर्गका बैंक तथा वित्तीय संस्थालाई सम्बोधन गरिएको परिपत्रले भुक्तानीको समय थप्ने अनुमति दिएको छ । साँवा वा ब्याज मिनाहा तथा जरिवाना छुटको व्यवस्था भने यसमा उल्लेख छैन ।

यो सहुलियतले बाढीपछि आम्दानी रोकिएका व्यवसायको तत्कालको भुक्तानी दबाब घटाउन सक्छ । ठूलो क्षति बेहोरेका र लामो समय उत्पादन बन्द हुने परियोजनाको पुनरुत्थानका लागि भने थप सहयोग आवश्यक पर्न सक्छ ।