रास्वपा फूटको संघारमा, महामन्त्रीलाई बर्खास्त गर्ने तयारी

काठमाण्डौ । युवा मतदाताको रोजाई बन्न थालेको र सर्वसाधारणमा आशाको सञ्चार गर्न सफल राष्ट्रिय स्वतन्त्र पार्टी (रास्वपा) समेत फूटको संघारमा पुगेको छ ।  

सरकारमा सहभागी हुँदा भागबण्डाको पुरानै शैली र अवसरवादमा फसेको आरोप खेपेको रास्वपा फूटको संघारमा पुगेको स्रोतहरुले दाबी गरेका छन् । 

रास्वपामा फूटसम्म ल्याउने तयारी गरेको सूइँको पाएपछि सभापति रवि लामिछाने र उपसभापति स्वर्णिम वाग्लेको जोडबलमा महामन्त्री डा. मुकुल ढकाललाई आजै पदबाट बर्खास्त गर्ने तयारी गरिएको छ ।  

रास्वपाले ढकालमाथि पार्टी अनुशासनभन्दा बाहिर रहेर बोलेको र सोही कारण पार्टीको इमेज जनमानसमा खराब बनाएको आरोप लगाउँदै आएको छ । यही आरोपको आधारमा टेकेर रास्वपाले ढकाललाई कारबाही गर्न लागेको हो । यसैका लागि अहिले सो पार्टीका शीर्ष नेताहरुबीच छलफल चलिरहेको बताइएको छ ।  

रास्वपाको आजको बैठकमा आफूलाई बोल्न बन्देज लगाइएको विरोधस्वरु डा. ढकाल मुखमा टेप बाधेर सांकेतिक विरोधसहित उपस्थित भएका थिए ।  

त्यसपछि पनि निरन्तर बसेको बैठकमा आफूलाई नचाहिँदो विषयमा पेल्न खोजिएको भन्दै डा. ढकाल बाहिरिएका थिए । बैठकबाट बाहिरिँदै गर्दा उनले सञ्चारकर्मीहरुसँग पार्टी सभापति रवि लामिछानेको अवसरवादी कार्यशैलीको कडा आलोचना गरेका थिए । पार्टीभित्रको आन्तरिक लोकतन्त्र नामेट हुँदै गएको, वाक स्वतन्त्रता नरहेको र पार्टी सभापति प्रहरी संगठनमा गैरजिम्मेवार ढंगले हस्तक्षेप गर्ने गरेका भन्दै कडा आलोचना गरेका थिए ।  

पार्टी सभापतिविरुद्ध एकपछि अर्को विष बमन गरेपछि शीर्ष नेताहरु थप आक्रोशित बनेका देखिएको छ । यिनै कारण महामन्त्री ढकाललाई कारबाही गर्ने तयारी पार्टीले गरेको हो ।  

डा. ढकाल निकट स्रोतका अनुसार पार्टीले बर्खास्तीको कारबाही गरे उनले केही केन्द्रीय सदस्यसहित नयाँ पार्टी गठन गर्नेछन् । योसँगै रास्वपा समेत पुराना दलहरुकै शैलीमा फूट्नेछ।