.gif)
.gif)
काठमाण्डौ । सधैंको साता जस्तै आज पनि हामीले नियमित स्तम्भ ग्राउण्ड जिरोलाई निरन्तरता दिएका छौं । आज मौद्रिक नीति आएपछि पहिलो सेयर कारोबार भएको कारण लगानीकर्ताहरुले आजको सेयर बजारलाई निकै उत्सुकताका साथ हेरेका थिए ।
आज ब्रोकरहाउसहरुमा लगानीकर्ताहरुको उपस्थित खचाखच थियो । आज राजधानीका ब्रोकरहाउस मात्र नभएर धेरैजसो ब्रोकरहाउसहरु भएको पुतलीसडक क्षेत्रका सडकमा समेत निकै भिडभाड देखिन्थ्यो । आज हामी बिहान १० बज्दा नबज्दै पुतलीसडकका विभिन्न ब्रोकर हाउसहरुमा पुगेका थियौं । आज हामी सबै भन्दा पहिले अनलाइन सेक्युरिटिज (स्टक ब्रोकर नम्बर ४९) मा पुग्यौं । अघिपछि १२ बजे पनि नभेटिने लगानीकताहरु आज भने १० बजे नै ब्रोकरहाउसहरुमा भरिभराउ देखिन्थे ।
ब्रोकरहाउमा १० बजेदेखि नै चहलपहल देखिन्थ्यो भने फोनका घण्टीहरु पनि निरन्तर बजेको सुुनिन्थ्यो । धेरै लगानीकर्ताहरुले ब्रोकर सञ्चालकलाई फोन गरेर बजारको अवस्था र स्क्रिप्टको विषयमा जिज्ञासा राखेको पाइन्थ्यो ।
आज विहान ११ बजे बजार खुल्ने बित्तिकै एक मिनेटमा नै ४ प्रतिशतले बढेर कारोबार बन्द भयो । बजारमा देखिएको सुरुवाति उछालले लगानीकर्तामा उत्साह छायो । केही लगानीकर्ताले तालि बजाएर खुसी व्यक्त गरेको देखियो । त्यहाँ उपस्थित एक महिला लगानीकर्ताले अझै पनि आफ्नो साँवा नउठेको बताइन् ।
(1).gif)
उनले भनिन् , ‘मेरो त अझै साँवा पनि आएको छैन । बजार बढ्यो भने त हाइड्रो बेचेर सुरक्षित बैंकतर्फ सिफ्ट हुने हो । बैंकमा धेरै घाटा पनि हुँदैन ।
कारोबार बन्द भएको २० मिनेटपछि खुलेको बजारमा ११ बजेर २१ मिनेटमा फेरि अर्को सर्किट लाग्यो । बजारले पुनः दोस्रोपटक अपर सर्किट हानेपछि ब्रोकर हाउसमा उपस्थित लगानीकर्ता खुसी छायो ।
केही समयको बसाईपछि हामी श्वेता सेक्युरिटिज (स्टक ब्रोकर नम्बर २५)मा पुग्यौं । यहाँ पनि लगानीकर्ताहरुको राम्रो उपस्थिती थियो । बजारमा दोस्रो सर्किट लागेर ४० मिनेटका लागि कारोबार बन्द भएको थियो । यत्तिकैमा एक जना लगानीकर्ता नमस्कार है भन्दै हातमा क्याप ब्रोकर हाउसमा छिरे । ब्रोकरहाउस छिरेपछि उनले सोधे‘ के भयो बजार ?’ ब्रोकर हाउसमा बसेका लगानीकर्ताले उनलाई स्वागत गर्दै भने, ‘बस्नुस् है वकिल साप । आज बजार २ सर्किट लागेर बन्द भएको छ । अब तेस्रो सर्किटको पालो छ । अब ४० मिनेट धैर्य गर्नुस् । उनले थप्दै भने, ‘संस्थागत लगानीकर्ताहरुले पैसा खनाउँदै छन । त्यसैले बैंकमा उछाल आएको छ ।’
उनीसँगै बसेका लगानीकर्ताले भने बजार संधै यसरी नबढ्ने तर्क गरे । ‘बजार राम्रै बढेको छ । केही न केही करेक्सन आउँछ होला ।’ उनलाई जबाफ दिँदै अर्का लगानीकर्ताले भने, ‘बजार अहिले इन्ट्रा डे करेक्सन हुँदै बढेको छ । ठूलो करेक्सन त नआउँला ।’
केही समयको बसाईपछि हामी नजिकै रहेको सेक्योर्ड सेक्यूरिटिज (स्टक ब्रोकर नम्बर ३६) मा पुग्यौं । यहाँ पनि लगानीकर्ताहरुको उपस्थित राम्रै थियो । यसबेलासम्म दिनको १ बजिसकेको थियो । बजारमा केही बिक्री दवाब पर्दै थियो । ‘बजार त राम्रै बढ्छ जस्तो छ । सरकारलाई पनि पूँजीबजार बढाएर देखाउनु परेको छ ।’ एक लगानीकर्ताले यसो भन्दै उठेर सेयर किन्न लागे । यस ब्रोकर हाउसमा पनि लगानीकर्ताहरुमा निकै उमंग देखिन्थ्यो ।
केही समयको बसाईपछि हामी कलश सेक्यूरिटिज (स्टक ब्रोकर नम्बर ७४) मा पुग्यौं । यहाँ पनि लगानीर्ताको उपस्थिति राम्रै थियो । यस ब्रोकरमा केही लगानीकर्ताहरुले घरजग्गाको विषयमा पनि चर्चा गरेको सुनियो । यसै ब्रोकरमा भेटिएको एक लगानीकर्ताले भने, ‘आज सेयर पनि किनियो । अब राधेराधेको ४ आना जग्गा पनि किन्ने हो । बैंकको ब्याज निक्कै सस्तो छ । घरजग्गा र सेयर बजार अब राम्रै चल्छ ।’
(58).jpg)
(78).jpg)
(1).gif)
.gif)
