.gif)
(1).gif)
.jpg)
_(1).gif)
.png)
काठमाण्डौ । राष्ट्रिय स्वतन्त्र पार्टीका सांसद हरि ढकालले सांसदहरुले सेयरको मूल्य तोक्नु उचित नभएको बताएका छन् । आफ्नो आधिकारीक फेसबुक पेजमार्फत ढकालले पूँजी बजारको वर्तमान अवस्थाबारे टिप्पणी गदै यस्तो धारणा राखेका हुन् ।
‘हामी सांसदहरुले सेयर बजारका कम्पनीको सेयर मूल्य तोक्ने, असल वा खराब कम्पनी छुट्याउने, बजारका लगानीकर्ताको नाम तोकेर टिप्पणी गर्ने र बजारलाई प्रभावित पार्ने गरी अभिब्यक्ति दिने काम गर्नु विल्कुलै उचित हैन, उनले लेखेका छन्, ‘हामीले ऐन नियम बनाउने र त्यसको कार्यान्वयनबारे सरोकार मात्र राख्ने हो । केही सांसदबाट भएको अनुपयुक्त वक्तब्यबाजीप्रति खेद व्यक्त गर्दछु । तर बजारमा भईरहेको सर्वसाधारणको लगानीलाई जोखिममा पार्ने गैरकानूनी गतिविधिहरु नियन्त्रण गर्न सरकार र नियमनकारी निकायहरु पनि उत्तिकै चनाखो हुनुपर्नेमा जोड दिन्छु ।’
यस्तै सांसद ढकालले बजारको पूँजीकरण र देशको जीडीपीलाई लिएर भईरहेको टीकाटिप्पणी अप्रासांगिक भएको दाबी गरेका छन् । सेयर बजारमा दैनिक कारोबारयोग्य सेयरको मूल्यको आधारमा हिसाब गर्दा झण्डै १७ खर्ब मात्र बजार पूँजीकरण रहेको उनले बताएका छन् । ‘बजारका राम्रा कम्पनीहरुको सेयरको मूल्य अझै धेरै सस्तो र आम सर्वसाधारण लगानीकर्ताले ५ वर्ष अगाडि किनेको मूल्य भन्दा धेरै कम्पनीको सेयर मूल्य तल रहेकोले अहिले आत्तिनुपर्ने गरी केही भएकै छैन भन्नेमा म सरोकारवाला सबैको ध्यानाकर्षण गराउँछु’ ढकाल लेख्छन् ।
ढकालले सरकारले पूँजी बजारको सुधार र बिस्तारका लागि धेरै कामहरु गर्नेतर्फ सक्रियता नदेखाएकाले अपेक्षाकृत रुपमा बजारको स्थायित्व कायम हुन नसकेकाले तत्काल त्यतातिर ध्यान दिन आग्रह समेत गरेका छन् । लामो समयदेखि धितोपत्र बोर्डको अध्यक्ष रिक्त रहँदा कयौं कामहरु अवरुद्ध रहि बजारको नियमनमै बाधा परेको बताउँदै ढकालले बोर्डमा तत्काल कुनै स्वार्थ समूहबाट प्रभावित नभएको सक्षम, योग्य र स्वच्छ व्यक्ति नियुक्त गर्न माग गरेका छन् ।
उनले पृष्ठभुमिमा उभिएर सधैं आम सर्वसाधारण लगानीकर्ताको हित र पूँजी बजारको विकास र बिस्तारका लागि लडिरहने प्रण व्यक्त गर्दै कसैको बहकाउमा नपरी जोखिमको अवस्था विचार गरेर आफ्नै अध्ययन, विश्लेषण र निर्णयले राम्रा कम्पनीहरुमा सुझबुझपूर्ण र आफ्नो स्वविवेक प्रयोग गर्न आम लगानीकर्ताहरुलाई अपिल गरेका छन् ।
.gif)
.png)
(52).jpg)
.gif)
.gif)
