यो साता ३ हजारको विन्दुमा प्रतिरोध सामना गरेको बजार आगामी साता कस्तो रहला ?

STOCK MARKET
शुक्रबार, भाद्र ७,२०८१ 15:29:51

काठमाण्डौ । यो साता सेयर बजारमा ३ दिन मात्रै कारोबार भयो । यो साता रक्षाबन्धन र गाईजात्राका कारण २ दिन सेयर कारोबार हुन सकेन । ३ दिनको कारोबारमा बजार २ दिन बढ्यो भने १ दिनमात्रै घट्यो । अघिल्लो साता ३ हजारको विन्दुमा बन्द भएको बजार यो साता २९७४.४६ विन्दुमा बन्द भयो । यस हिसाबले यो साता सेयर बजारमा २६.३५ अंकको गिरावट आयो । अघिल्लो साता बजार २३४.४३ अंकले बढेको थियो ।

यो साताको ३ कारोबार दिनमा ६६.९० अर्बको कारोबार भयो । अघिल्लो साता यस्तो कारोबार १ खर्ब २८ अर्बबराबर कारोबार भएको थियो । यो साता बजार पूँजीकरण ४७.२४ खर्ब रुपैयाँ पुग्यो । यस्तो बजार पू्ँजीकरण अघिल्लो साता ४७.६६ खर्ब रुपैयाँ रहेको थियो । यस हिसाबले यो साता नेप्से बढ्दा बजार पूँजीकरण २६.५८ अर्बले घटेको छ ।

प्राविधिक पक्षः

क्याण्डल स्टिकको आधारमा

क्याण्डल स्टिकको आधारमा यो साताको साप्ताहिक चार्टमा वियरिस स्पिनिङ प्रकृतिको क्याण्डल बनेको छ । यो क्याण्डल भनेको अनिर्णयको संकेत हो । यसले लगानीकर्ता ठूलो अनिर्णयमा भएको संकेत गर्छ । यदि आगामी कारोबारमा बजार यो साताको न्यून विन्दु २९४७ भन्दा तल गएमा बजारमा बिक्री दबाब र ३०४७ भन्दा माथि लागेमा बजारले फेरि अप ट्रेन्ड पनि लिन सक्ने छ ।

बोलिङ्गर ब्याण्ड , म्याक्डी तथा आरएसआई

बोलिङ््गर ब्याण्डको आधारमा यो साताका ३ कारोबारमा बजारले अपर ब्याण्ड छोडेको देखिन्छ । म्याक्डीको आधारमा भने एमएसीडी लाइन र सिग्नल लाइनबीच करिब बियरिस क्रसओभर बन्दै गरेको देखिन्छ । तर यो साता नै वियरिस बनि सकेको अवस्था भने होइन । एमएफआई(मनी फ्लो इन्डेक्स) र आरएसआईमा पनि बियरिस डाइभर्जेन्स बन्दै गरेको देखिन्छ ।

पिभट् प्वइन्टः

पिभट विश्लेषण मार्फत सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानि यसको भविष्यमा हुने मूल्यको उतारचढाव निकालिन्छ ।

बढेमा प्रतिरोध

प्रतिरोध ३ – ३३५५

प्रतिरोध २ – ३१९६

प्रतिरोध १– ३०९८

पिभट् प्वइन्टः २९३८

घटेमा सपोर्ट

सपोर्ट १– २८३८

सपोर्ट २– २६४१

सपोर्ट ३ – २५८३

निष्कर्षः सातौं सातासम्म लगातार बढेको सेयर बजारमा यो साता भने ब्रेक लागेको छ । विभिन्न इन्डिकेटरबाट नियाल्दा बजारमा यो साता बिक्री दबाब परेको देखिन्छ । डाउ थेउरी अथवा प्राइस एक्सनबाट नियाल्दा पनि बजारले हायर हाई र हायर लो का सिरिजहरु नै बनाएको छ । बजारले अहिले नै कुनै चेञ्ज अफ क्यारेक्टर बनाएको देखिदैन ।

अर्थात बजारले कुनै प्रष्ट दिशा निर्धारण गरेको देखिदैन । कारोबार तथा भोल्युमबाट नियाल्दा बजारले यो साता एभरेज भोल्युम भन्दा कम भोल्युम आएको देखिन्छ । यद्यपी बजार सधैं बढेको बढ्यै र घटेको घट्यै पनि गर्न नसक्ने भएको कारण बजारमा आगामी साता केही करेक्सन हुन्छ भने त्यो बजार थप मजबुत नै हु्ने छ ।

इलिअट वेभमार्फत नियाल्दा यदि बजार आगामी साता पनि ३ हजार विन्दुमाथि टिक्न सक्दैन भने यो साता माइनर डिग्रीको तेस्रो वेभ सकिएको र आगामी साता चौथौ वेभ चल्दा बजारमा सामान्य करेक्सन आउन सक्छ । यद्यपी अघिल्लो साताको पेस्टल र इलिअट वेभ मार्फत गरेको विश्लेषण अनुसार बजारले केही करेक्सन पछि नयाँ हाई बनाउने विषयमा भने हामी अडिग नै छौं ।

नोटः सेयर बजारमा लगानी जोखिमपूर्ण हुन्छ, यो विश्लेषण कारोबारका लागि सिफारिस भने होइन ।