.gif)
_(1).gif)
.png)
काठमाण्डौ । लघुवित्त वित्तीय संस्थाहरुको खुद नाफा ८७.३७ प्रतिशतले बढ्न पुगेको छ । गत आर्थिक वर्षको अन्त्यसम्ममा अधिकांश लघुवित्तको मुनाफा उल्लेख्य वृद्धि भएको छ ।
गत आवको असार मसान्तसम्म समग्रमा लघुवित्त संस्थाहरुले ७ अर्ब ५९ करोड ७० लाख रुपैयाँ खुद नाफा आर्जन गरेका छन् । जुन यो अघिल्लो आवको तुलनामा ८७।३७ प्रतिशतले बढी हो । अघिल्लो आवमा लघुवित्त कम्पनीहरुको नाफा ४ अर्ब ५ करोड रुपैयाँ थियो ।
गत आवमा लघुवित्त संस्थाहरुको खराब कर्जा अनुपातमा सुधार देखिएसँगै संस्थाहरुले ब्याज आम्दानी सुधार गरी नाफा बढाएका हुन् । अघिल्लो आवमा १२ वटा संस्था घाटामा रहेकोमा गत आवमा भने ३ वटा संस्थाले मात्रै घाटा ब्यहारेका छन् ।
गत आवमा लघुवित्त संस्थाहरुको खुद नाफामा अस्वभाविक सुधार देखिएको छ । नेपाल राष्ट्र बैंकले दिएको कर्जा पुनर्संरचना र पुनर्तालिकीकरणको व्यवस्थाले लघुवित्त संस्थाहरुको नाफामा उल्लेख्य सुधार देखिएको लघुवित्त बैंकर्स संघका अध्यक्ष रामबहादुर यादवले बताए ।
नेपाल राष्ट्र बैंकले ल्याएको उक्त व्यवस्थाका कारण लघुवित्त संस्थाहरुको कर्जा रिकभरी उल्लेख्य सुधार हुँदा औसत ब्याज आम्दानी बढ्न पुगेकाले नाफामा सुधार देखिएको यादवले बताए ।
गत आर्थिक वर्षमा सर्वाधिक नाफा कमाउने संस्थामा छिमके लघुवित्त रहेको छ । संस्थाले १ अर्ब ९ लाख रुपैयाँ नाफा कमाएको छ । तर संस्थाको यो नाफा अघिल्लो आवको तुलनामा ५.७४ प्रतिशतले कम हो । अघिल्लो आवमा संस्थाले १ अर्ब ६ करोड रुपैयाँ नाफा कमाएको थियो ।
त्यस्तै, दोस्रो बढी नाफा कमाउने संस्थामा साना किसान विकास लघुवित्त रहेको छ । संस्थाले असार मसान्तसम्म ९४ करोड ९६ लाख रुपैयाँ नाफा आर्जन गरेको छ । यो अघिल्लो आवको तुलनामा २२.७७ प्रतिशतले बढी हो ।
यता जीवन विकास लघुवित्तले पनि ५८ करोड २२ लाख रुपैयाँ नाफा आर्जन गरी तेस्रो धेरै नाफा कमाउने संस्था बन्न सफल भएको छ । संस्थाको यो नाफा ४३.६७ प्रतिशतले बढी हो ।
त्यस्तै, डिप्रोक्स लघुवित्तले ५८ करोढ १६ लाख, स्वाबलम्बल लघुवित्तले ५३ करोड ८२ लाख, निर्धन उत्थानले ५० करोड ६४ लाख, नेरुडेले ४४ करोड ७० लाख, नेशनल माइक्रोफाइनान्सले ३४ करोड ९ लाख, फरवार्ड माइक्रोफाइनान्सले ३२ करोड १३ लाख, मेरो माइक्रोफाइनान्सले २१ करोड ९५ लाख, फर्स्ट माइक्रोले १७ करोड ४२ लाख र ग्रामिण विकासले १४ करोड ७३ लाख रुपैयाँ नाफा कमाएको छ ।
गत आवमा सामुदायिक लघुवित्त, धौलागिरी लघुवित्त र एनएमबी लघुवित्तले भने नोक्सान ब्यहोरेका छन् ।
कुनको नाफा कति बढ्यो ?
अघिल्लो आवको तुलनामा गत आवमा सर्वाधिक नाफा बढाउनेमा आशा लघुवित्त रहेको छ । संस्थाले ४०५००.६८ प्रतिशतले नाफा वृद्धि गरेको छ । अघिल्लो आवमा जम्मा १ लाख ४८ हजार रुपैयाँ मात्रै नाफा कमाएको संस्थाले गत आवमा ६ करोड रुपैयाँ नाफा कमाएको छ ।
त्यस्तै, मातृभूमी लघुवित्तले पनि ३७३३.१६ प्रतिशतले नाफा बढाएको छ । अघिल्लो आवमा २९ लाख ९२ हजार रुपैयाँ नाफा कमाएको यो संस्थाले गत आवमा ११ करोड ४६ लाख रुपैयाँ नाफा आर्जन गरेको छ ।
त्यस्तै, अभियान लघुवित्तले १७५५ प्रतिशत, गुराँस लुघवित्तले १४४९ प्रतिशत, सम्पदा लघुवित्तले ७३५ प्रतिशत, नेरुडे लघुवित्तले ६७२ प्रतिशत, इन्फिनिटी लघुवित्तले ६०१ प्रतिशत, महिला लघुवित्तले ५३१ प्रतिशत, मेरो माइक्रोले ३६२ प्रतिशत र डिप्रोक्स लघुवित्तले ३३१ प्रतिशतले नाफा बढाएका छन् ।
अघिल्लो आवको तुलनामा गत आवमा १० वटा संस्थाको नाफा घटेको छ । सर्वाधिक बिजय लघुवित्तको नाफा ७८.५६ प्रतिशतले घटेको छ ।
२६ वटा संस्थाको खराब कर्जा घट्यो
गत आर्थिक वर्षमा २६ वटा संस्थाको खराब कर्जा अनुपात (एनपीएल)घट्न पुगेको छ । खराब कर्जाको अवस्था घट्दा संस्थाहरुको ब्याज आम्दानी बढेर नाफा बृद्धिमा टेवा पुगेको हो ।
अघिल्लो आवको तुलनामा सर्वाधिक खराब कर्जा घटाउनेमा नाडेप लघुवित्त रहेको छ । नाडेपले ९.२० प्रतिशतले खराब कर्जा घटाएको छ । अघिल्लो आवमा १७.४८ प्रतिशत रहेको संस्थाको खराब कर्जा अनुपात गत आवमा घटेर ८.२८ प्रतिशतमा कायम भएको छ ।
त्यस्तै, आरम्भ चौतारी लघुवित्तले ७.५१ प्रतिशत, जनउत्थान सामुदायिक लघुवित्तले ६.९७ प्रतिशत, धौलागिरी लघुवित्तले ४.२२ प्रतिशत, मानुषी लघुवित्तले ३.४४ प्रतिशत, ग्रामिण विकासले ३.३० प्रतिशत, डिप्रोक्सले ३.२६ प्रतिशत, एनएमबीले ३.१९ प्रतिशत र शृजनशील लघुवित्तले ३.०४ प्रतिशतले एनपीएल घटाएका छन् ।
गत आवमा २३ वटा संस्थाको खराब कर्जा भने बढ्न पुगेको छ । सर्वाधिक समता घरेलु लघुवित्तको खराब कर्जा ५.९७ प्रतिशतले बढ्न पुगेको छ ।
.gif)
.png)
(18).jpg)
.jpg)
.jpg)
.jpg)
.gif)
.gif)
.gif)
