१७ म्युचुअल फण्डले गरे लाभांश घोषणा, १३ वटाको बुक क्लोज हुन बाँकी

STOCK MARKET
सोमबार, भाद्र १७,२०८१ 17:59:19

काठमाण्डौ । नेपाल स्टक एक्सचेञ्ज (नेप्से)मा सूचीकृत ३६ वटा म्युचुअल फण्डमध्ये हालसम्म १४ वटा फण्डले मात्रै लाभांश घोषणा गरेका छन् । १४ वटा फण्डहरुले गत आर्थिक वर्षको मुनाफाबाट आफ्ना इकाईधनीहरुलाई नगद लाभांश प्रस्ताव गरेका हुन् ।

अझै १९ वटा फण्डको लाभांश घोषणा हुन बाँकी छ । नेपालमा दुई किसिमका म्युचुअल फण्ड सञ्चालनमा छन् । खुलामुखी योजना र बन्दमुखी योजना । नेप्सेमा बन्दमुखी योजना तथा फण्डहरु मात्रै सूचीकृत छन् ।

हालसम्म १४ वटा बन्दमुखी र ३ वटा खुलामुखी म्युचुअल फण्ड गरी १७ वटाले गत आवको मुनाफाबाट आ–आफ्ना इकाईधनीलाई लाभांश प्रस्ताव गरेका छन् । जसमध्ये ४ वटा फण्डको बुकक्लोज समेत भइसकेको छ ।

सनराइज फोकस्ड इक्विटी फण्ड, सनराइज फर्स्ट म्युचुअल फण्ड, लक्ष्मी भ्यालु फण्ड–२ र लक्ष्मी उन्नती कोषको बुकक्लोज भइसकेको छ । नेप्सेमा सूचीकृत बाँकी १० वटा फण्डको इकाई खरिद गर्दा अझै लाभांश पाउन सकिनेछ ।

बुकक्लोज हुन बाँकी रहेका १० मध्ये कुमारी इक्विटी फण्ड, कुमारी धनबृद्धि योजना र सिद्धार्थ इन्भेष्टमेन्ट ग्रोथ स्किम–३ ले बुकक्लोजको मिति तय गरिसकेका छन् भने अन्य फण्डले बुकक्लोजको मिति तोक्न बाँकी नै छ ।

कुमारी क्यापिटलका दुई योजनाले भदौ १९ गते र सिद्धार्थ इन्भेष्टमेन्ट ग्रोथ स्किम–३ ले भदौ २३ गते बुकक्लोजको मिति तोकेका छ । यसर्थ कुमारी क्यापिटलका दुई योजनाको इकाई भोलिसम्म खरिद गर्दा लाभांश पाउन सकिनेछ भने सिद्धार्थ इन्भेष्टमेन्ट ग्रोथ स्किम–३ को इकाई भदौ २० गतेसम्म खरिद गर्दा लाभांश पाउन सकिनेछ ।

कुनको कति लाभांश ?

हालसम्म लाभांश घोषणा गरेका म्युचुअल फण्डहरुमा सानिमा इक्विटी फण्डले आफ्ना इकाईधनीहरुलाई सर्वाधिक लाभांश घोषणा गरेको छ । फण्डले गत आवको मुनाफाबाट १५ प्रतिशत नगद लाभांश घोषणा गरेको छ । कम्पनीले लाभांश प्रयोजनार्थ बुकक्लोजको मिति तोक्न बाँकी छ । यसर्थ दोस्रो बजारबाट उक्त फण्डको इकाई खरिद गर्दा लाभांश पाउन सकिनेछ ।

त्यस्तै, दोस्रोमा एनआइसी एशिया सेलेक्ट ३० ले आफ्ना इकाईधनीहरुलाइ १४ प्रतिशत नगद लाभांश घोषणा गरेको छ भने तेस्रोमा सनराइज फर्स्ट म्युचुअल फण्डले पनि आफ्ना इकाईधनीलाई १२.५ प्रतिशत नगद लाभांश प्रस्ताव गरेको छ ।

त्यस्तै, एनआइसी एशिया फ्लेक्सी क्याप फण्डले १०.५ प्रतिशत, सानिमा लार्ज क्याप फण्ड र सानिमा इक्विटी फण्डले १०–१० प्रतिशत, कुमारी इक्विटी फण्ड, कुमारी धनबृद्धि योजना र एनआइसी एशिया ग्रोथ फण्डले ९.५ प्रतिशत, एनआइसी एशिया ब्यालेन्स्ड फण्डले ९.२५ प्रतिशत, लक्ष्मी उन्नती कोषले ७.५० प्रतिशत, सिद्धार्थ इन्भेष्टमेन्ट ग्रोथ स्किम–३ले ७ प्रतिशत, सनराइज फोकस्ड इक्विटी फण्डले ४.५ प्रतिशत र लक्ष्मी भ्यालु फण्ड–२ ले ४.५० प्रतिशत नगद लाभांश घोषणा गरेको छ ।

खुलामुखी योजनातर्फ

एनआईसी एसिया डायनामिक डेब्ट फण्ड, कुमारी सुनौलो योजना र शुभलक्ष्मी कोष लाभांश घोषणा

भएका खुलामुखी योजना हुन् । खुलामुखी योजनाहरु नेप्सेमा सूचीकृत हुँदैनन् । यस्ता योजनाको इकाईहरु तोकिएका बैंक तथा वित्तीय संस्थाका शाखाबाट मात्रै कारोबार गर्न मिल्छ ।

साथै खुलामुखी योजना एसआईपी (सिस्टमेटिक इन्भेस्टमेन्ट प्लान) प्रक्रियाबाट पनि खरिद गर्न सकिन्छ । एसआईपीअन्तर्गत हरेक महिना वा त्रैमासिक रुपमा निश्चित रकम भुक्तानी गर्दा योजनाका युनिट हितग्राही खातामा जम्मा गर्दै लगिन्छ ।

खुलामुखीतर्फका म्युचुअल फण्डहरुमा एनआइसी एशिया डायनामिक डेब्ट फण्डले १० प्रतिशत, कुमारी सुनौलो योजनाले १०.५ प्रतिशत र शुभ लक्ष्मी कोषले ७.५ प्रतिशतल लाभांश घोषणा गरेका छन् ।

यी फण्डहरुले पनि लाभांश प्रयोजनार्थ बुकक्लोजको मिति तोक्न बाँकी छ । इच्छुक लगानीकर्ताहरुले तोकिएको बैंक तथा वित्तीय संस्था वा एसआइपीमाध्यमबाट उक्त योजना खरिद गरी लाभांश पाउन सक्नेछन् ।