स्ट्याण्डर्ड चार्टर्ड बैंकको सेवा सातै प्रदेशमा बिस्तार, सुर्खेत र धनगढीमा नयाँ शाखा

काठमाण्डौ । स्ट्याण्डर्ड चार्टर्ड बैंक नेपाल लिमीटेडले असोज १९ गते कर्णाली प्रदेशको सुर्खेतको वीरेन्द्रनगर र असोज २० गते सुदुरपश्चिमको धनगढी, कैलालीमा गरी दुईवटा शाखा कार्यालयहरुको विधिवत सञ्चालन थालेको छ ।  

यी दुई प्रदेशमा शाखा बिस्तारसँगै स्ट्याण्डर्ड चार्टर्ड बैंकका शाखाहरु देशका सातै प्रदेशमा बिस्तार भएका छन् । नेपाल राष्टबैंकले क वर्गका वाणिज्य बैंकहरुले सबै प्रदेशमा शाखा कार्यालयहरु स्थापना गर्नुपर्ने व्यवस्था गरेको थियो । 

यी दुवै शाखा कार्यालयहरुको नेपाल राष्टबैंकका गभर्नर महाप्रसाद अधिकारीले भर्चुअल रुपमा उद्घाटन गरे । सुर्खेत, वीरेन्द्रनगरको शाखा उद्घाटनका लागि असोज १९ गते आयोजित समारोहमा कर्णाली प्रदेशका आर्थिक मामिला तथा योजना मन्त्री राजीवबिक्रम शाहको उपस्थिति थियो । दुवै शाखा कार्यालय उद्घाटन समारोहमा स्ट्याण्डर्ड चार्टर्ड बैंकका सञ्चालक समितिका सदस्य सिद्धान्तराज पाण्डेको पनि उपस्थिति थियो । 

समारोहमा धन्यवाद ज्ञापन गर्दै बैंकका प्रमुख कार्यकारी अधिकृत अनिर्वाण घोष दस्तिदारले शाखा कार्यालयहरु स्थापनाका क्रममा केन्द्रीय बैंकबाट भएको मार्गदर्शन र सहयोगका लागि आभार प्रकट गरे ।  

बैंकले एक विज्ञप्ति जारी गर्दै देशभरका ग्राहकहरुलाई वित्तीय सेवाहरुको पहुँच विस्तार गर्ने महत्वपूर्ण भूमिकाप्रति पुनः प्रतिबद्धता समेत व्यक्त गरेको छ । नयाँ शाखाहरु बिस्तारसँगै स्थानीय व्यवसाय र ग्राहकहरुलाई गुणस्तरीय वित्तीय सेवा प्रदान गर्न सहज भएको तथा वित्तीय अवाश्यकता परिपूर्ति गर्ने लक्ष्य समेत राखिएको बैंकका कर्पोरेट अफेयर्स प्रमुख सिरिन खतिवडाले जारी गरेको विज्ञप्तिमा उल्लेख छ ।