सेयरमूल्य ६०० माथि, लाभांश चाहिँ शून्य ! विकल्प मर्जर हो ?

काठमाण्डौ । दोश्रो बजारमा प्रतिकित्ता ६०० रुपैयाँभन्दा बढीमा सेयर कारोबार भइरहेको बेष्ट फाइनान्स कम्पनी लिमीटेडले सेयरधनीको हात खालि राख्दै वार्षिक साधारणसभा आह्वान गरेको छ ।  

फाइनान्सको असोज २२ गते बसेको सञ्चालक समितिको ५९१ औं बैठकले आगामी कात्तिक १४ गते बुधबारका दिन काठमाण्डौको कमलादिस्थित प्रज्ञा प्रतिष्ठानमा आफ्नो २७ औं वार्षिक साधारणसभा आह्वान गर्ने निर्णय गरेको हो । 

वित्तीय रुपमा निकै कमजोर यो कम्पनीले सेयरधनीलाई लाभांश बाँड्ने गरी आम्दानी र नाफा नगरेका कारण सोसम्बन्धी कुनै पनि प्रस्ताव सञ्चालक समितिले गर्न नसकेको देखिएको छ ।  

साधारणसभामा भविष्यमा अन्य उपयुक्त बैंक तथा वित्तीय संस्थासँग एकआपसमा गाभ्ने गाभिने तथा प्राप्ति गर्ने सम्बन्धी प्रस्ताव समेत पेश हुनेछ । सोसम्बन्धी कार्य गर्ने सम्पूर्ण अधिकार सञ्चालक समितिलाई अख्तियारी गर्ने अजेण्डा समेत राखिएको छ ।  

सभामा बेष्ट फाइनान्सको आर्थिक वर्ष २०७९-८० को सञ्चालक समितिको प्रतिवेदन उपर छलफल गरी पारित गर्ने, लेखापरीक्षकको प्रतिवेदन सहितको आ.ब. २०७९-८० को वार्षिक वित्तीय विवरण छलफल गरी पारित गर्ने लगायतका अजेण्डा समेत राखिएको छ । 

सञ्चालक समितिबाट रिक्त रहेको पदमा बाँकी कार्यकालका लागि २ जना सञ्चालकको नियुक्तिलाई अनुमोदन गर्ने, संस्थाको प्रबन्धपत्र र नियमावली संसोधन लगायतका प्रस्ताव समेत पेश हुने बताइएको छ ।  

फाइनान्सले साधारणसभा प्रयोजनका लागि कात्तिक २ गते एकदिन सेयरधनी किताब बन्दको समेत घोषणा गरेको छ । यो कम्पनीको साधारणसभामा सहभागी हुन चाहनेले कात्तिक १ गतेभित्रमा सेयर किनेर सेयरधनी कायम भइसक्नुपर्नेछ ।