मोफसलका लगानीकर्ता भन्छन् ‘आज बिनाकारण बजारमा पहिरो गयो, जोगिन सके फेरि मौका आउँछ’

काठमाण्डौ । सँधैको साता जस्तै यो साता पनि हामीले नियमित स्तम्भ ग्राउण्ड जीरोलाई निरन्तरता दिएका छौं । आजको स्तम्भमा हामीले मोफसल अर्थात पर्यटकिय नगर पोखराका लगानीकर्ताको मनोविज्ञान समेट्ने प्रयास गरेका छौं ।  

आज पोखरको माहोल अघिपछि भन्दा केही भिन्न देखिएको थियो । पूर्व गृहमन्त्री रबि लामिछानेलाई काठमाण्डौबाट गिरफ्तार गरि पोखरा ल्याए पछि पोखारको राजनीतिक मौसम एकाएक फेरिएको छ । चोक चोकमा सुरक्षाक्रमी तैनाथ गरिएको छ भने केही ठाँउहरुमा उनका समर्थकहरुले नाराबाजी समेत गरेका छन् ।  

जसको प्रभाव आज सेयर बजारमा पनि देखियो । कारोबारको सुरुवाती समायमा करिब ५० अंकभन्दा बढी अंकले घटेको बजारले मध्यकालमा केही सम्हालिने प्रयास गरेको थियो । तर बजार अन्त्यमा करिब ५० अंकले घटेर बन्द भयो ।

आज हामीले ग्राउन्ड जीरोको सुरुवात पोखराको नयाँ सडकमा रहेको नेपाल स्टक हाउस (स्टक ब्रोकर नम्बर १४) बाट गरेका छौं । यस ब्रोकरमा कारोबारको पहिलो सत्रमा लगानीकर्ताको उपस्थिति खासै थिएन । यसकारण हामीले केही समय यस ब्रोकरका सञ्चालकसँग सेयर बजारको पछिल्लो अवस्था र पोखरेली लगानीकर्ताको मनोबिज्ञानको बिषयमा जिज्ञासा राखेका थियौं । ब्रोकर सञ्चाकले केही राजनीतिक अस्थिरता र आन्दोलनको डरले लगानीकर्ता डराएको र आज केही बिक्री दबाब दिएको प्रतिक्रिया दिए ।  

यहाँबाट हामी नजिकै रहेको नासा सेक्यूरिटिजज (स्टक ब्रोकर नम्बर ५८) मा पुग्यौं । यसबेलासम्म दिनको १ बजिसकेको थियो । बजार केही सम्हालिने प्रयास गर्दै थियो । यस ब्रोकरमा पनि लगानीकर्ताको उपस्थिति खासै थिएन । यसै ब्रोकरमा भेटिएका एक लगानीकर्ताले भन्दै थिए, ‘आज रबि लामिछानेको कारण र आन्दोलन चर्कदै गर्दा बजारमा पहिरो गए जस्तो देखिन्छ ।’  हेनुहोस् यो बिनाकारण गएको पहिरो हो । पहिरोमा जोगिन सके राम्रै मौका आँउछ । अहिले त सेयर किनेर राख्ने समय हो ।’

उनले थप्दै भने, ‘माहोल हेरेर कारोबार गर्यो भने नेपालमा सेयर बजार जति सजिलो पैसा कुनै क्षेत्रमा छैन । अन्य ब्यापारमा भन्दा सेयर बजारमा वर्षमा दुईचारपटक मात्रै सेयर किनेर बेच्न सक्यो भने मनग्य आम्दानी हुन्छ । ल्यापटपमा किन्यो, बेच्यो । कर्मचारी पाल्नु पर्ला भन्ने पनि छैन । यसमा मुख्यगरि माहोल हेर्नु पर्छ । माहोल हेरेर कारोबार गर्यो भने राम्रै हुन्छ ।’

पोखराकै  स्थायीबासिन्दा भएको बताउने ती लगानीकर्ताले आज बजार खेलाडीले घटाएको आरोप समेत लगाउन भ्याए । ‘आज पहिरो गएको हो । पहिरोमा जोगियो भने फेरी मौका आँउछ,’ ती लगानीकर्ताले भने, ‘मैले त सन् नेपाल लाइफ इन्स्योरेन्समा राम्रै आम्दानी गरेको हो । अब पनि गर्ने आशा छ ।’ ब्रोकर हाउसमा यस्तै गल्फिति चल्दै थिए ।  

यहाँबाट हामी नजिकै रहको प्रिमियर सेक्यूरिटिज (स्टक ब्रोकर नम्बर ३२) मा पुग्यौैं । यहाँ पनि लगानीकर्ताको खासै उपस्थिति थिएन । हामीले केही समय ब्रोकर सञ्चालकसँग भलाकुसारी गर्यौं । यस ब्रोकरका सञ्चालकले पनि बजार घट्ने अन्य कुनै कारण नरहेकाले आन्दोलनकै कारण बजारमा बिक्री दबाब आएको तर्क गरे । यसबेलासम्म दिनको २ बजिसकेको थियो । बजार निरन्तर घट््दै थियो । यहाँबाट हामी न्यूरोडमा नै रहेको कोहिनूर सेक्यूरिटिज (स्टक ब्रोकर नम्बर ३५) मा पुग्यौं । यहाँपनि फाट्ट फुट्ट मात्रै लगानीकर्ता थिए । हामीले केही समय ब्रोकर सञ्चालकसँग बजारको विषयमा जिज्ञासा राख्यौं । यस ब्रोकरका सञ्चालकले पनि पहिले कै ब्रोकरले बोलेका विषय दोहोर्याउनदै भने, ‘बजार केही समय बढेर करेक्सनको फेजमा थियो । यहि समयमा बजारमा आन्दोलनको विषय पनि आयो । जसको कारण आज बजारमा गिरावट आएको छ र एक दुईदिनमा सम्हालिन सक्छ ।’