काठमाण्डौ महानगरपालिकाद्वारा तिहारमा प्लास्टिकको माला प्रयोगमा निषेध, भेटिए कारवाही गरिने

काठमाण्डौ । काठमाण्डौ महानगरपालिकाले प्लास्टिक तथा प्लाटिस्टकका पुष्प गुच्छा तथा माला बिक्री वितरण र प्रयोगमा प्रतिबन्ध लगाएको छ ।  

महानगरले आज एक सूचना जारी गर्दै आफ्नो वार्षिक नीति तथा कार्यक्रममा नै एकल प्रयोगको प्लास्टिक, प्लास्टिकको फूल गुच्छा, माला बिक्री, वितरण, भण्डारण, ओसार–पसार र प्रयोग तथा ४० माइक्रोनभन्दा पातला झोलाको बिक्री, वितरण, भण्डारण र प्रयोगमा पूर्ण रूपमा निषेध गरिएको जनाएको छ।  

महानगरले प्लास्टिकको झोलाको विकल्पमा कागज वा कपडाको झोला प्रयोग गर्न सबै प्रकारका उत्पादक, वितरक, बिक्रेता तथा सर्वसाधारणलाई आग्रह गरेको छ ।  

यस्तै महानगरको अनुगमन टोलीले निरीक्षणको क्रममा उक्त निषेध गरिएका कार्य भए गरेको पाइएमा महानगरपालिका वातावरण तथा प्राकृतिक स्रोत संरक्षण ऐन, २०७७ बमोजिम कारवाही गरिने सूचनामा उल्लेख छ ।