वारेन बफे(ट)ले दान दिए १६००० करोड, सेयरधनीसँग खोले आफ्नो सम्पत्तिको उत्तराधिकारीसम्बन्धी रहस्य

काठमाण्डौ । विश्वकै धनाढ्यमध्येमा गनिने तथा विश्वभरको सेयर बजारमा बादशाह उपनामले चिनिएका वारेन बफे(ट) सम्पत्ति आर्जनमा मात्र होइन, दान गर्ने विषयमा समेत निकै अगाडि छन् ।  

प्रत्येक वर्ष विभिन्न संस्थाहरुलाई ठूलो सम्पत्ति दान दिएका कारण उनी चर्चामा आउने गर्छन् । यो वर्ष पनि बफे(ट) यस्तै ठूलो दानका कारण चर्चामा आएका छन् ।  

९४ वर्षीय बफे(ट)ले यो वर्ष चारवटा च्यारिटी फाउण्डेसनलाई १.१ अर्ब अमेरिकी डलर अर्थात करिब १६००० करोड नेपाली रुपैयाँ बराबरको दान दिएका छन् । योसँगै बफे(ट)ले आफ्नो ताजा अभिव्यक्तिमा आफ्नो निधनपछि आफूले आर्जन गरेको अरबौंको सम्पत्ति के हुन्छ र त्यसको उत्तराधिकारी को हुन्छ भन्ने कुरा समेत खुलाएका छन् । 

उनी विश्वकै टप १० अर्बपतिमा सूचीकृत अमेरिकी धनाढ्य हुन् । नोभेम्बर २५ मा उनले बफे(ट) परिवारबाट सञ्चालित चार फाउण्डेसनलाई निकै ठूलो दान दिए । रिपोर्टअनुसार उनले १६ हजार करोड रुपैयाँभन्दा बढी मूल्यको वर्कसायर हाथ्वेको सेयर नै दान गरेका हुन् । यो कम्पनीको सेयर बजारमा अन्तिम कारोबार मूल्य प्रतिकित्ता ४७८.५६ अमेरिकी डलर बराबर रहेको छ ।  

निकै ठूलो दान दिएका उनले कम्पनीका सेयरधनीहरुको नाममा एउटा नोट पनि लेखेका छन् । त्यसमा उनले आफ्नो निधनपछि अरबौंको सम्पत्तिको विषयमा र त्यसको उत्तराधिकारीको विषयमा समेत खुलासा गरेका अमेरिकी मिडियाहरुले रिपोर्ट प्रकाशित गरेका छन् । सेयरधनीलाई सम्बोधन गर्ने क्रममा उनले भनेका छन् कि वर्कशायर हाथ्वेको १६०० क्लास ए सेयर २४ लाख क्लास बी सेयरमा परिणत हुनेछ। र, यसलाई चारवटै पारिवारिक फाउण्डेसनको नाममा बाँडफाँड गरिनेछ ।  

आफ्नो सम्बोधनमा बफे(ट)ले तथ्यसहित बाँडफाँडको मोडालिटी समेत उल्लेख गरेका छन् । 

आफ्नी दिवंगत पत्नी सुसीको नाममा स्थापित सुसान थम्पसन बफे(ट) फाउण्डेसनलाई १५ लाख कित्ता सेयर दिइनेछ । आफ्ना बच्चाहरुको नाममा खुलेका फाउण्डेसनलाई समेत उनले दानको घोषणा गरेका छन् । बफे(ट)की पत्नीको सन् २००४ मै निधन भइसकेको छ ।  

बफे(ट)ले शेरवुड फाउण्डेसनलाई ३ लाख कित्ता, हाँवर्ड जी. फाउण्डेसनलाई पनि ३ लाख कित्ता र नोवो फाउण्डेसनलाई पनि ३ लाख कित्ता नै दान दिने घोषणा गरेका छन् ।  

बफे(ट)ले दान दिएर बचेको आफ्नो ९९.५ प्रतिशत सम्पत्ति आफ्नो शेखपछि कसको नाउँमा जाने भन्ने विषय पनि खुलाएका छन् । उनले आफ्ना तीनै सन्तानप्रति भरोसा व्यक्त गर्दै आफ्नो निधनपछि वर्कशायरमा उनको सम्पत्ति तीनै सन्तान मिलेर सम्हाल्ने विश्वास व्यक्त गरेका छन् ।  

उनले सो क्रममा वंशवादी सम्पत्तिबाट जोगिनका लागि आफ्नो विश्वास व्यक्त गर्दै भनेका छन् -'मैले कहिले पनि वंश बनाउने र बच्चाहरुलाई अगाडि देखाएर सम्पत्ति कमाउने लालसा राखिँन । मैले कमाएको यति ठूलो सम्पत्ति प्रभावकारी ढंगले कसरी खर्च गरिन्छ भन्ने विषयमा म सधैं चिन्तित हुने गरेको छ । यसमा मेरा तीन बच्चाहरुले चुनौति स्वीकार गरेर सम्पत्तिको व्यवस्थापन प्रभावकारी ढंगले गर्लान् भन्ने विश्वास छ ।'  

ब्लुमबर्ग बिलेनियर्स इण्डेक्सका अनुसार बफे(ट)को नेटवर्थ १५० अर्ब डलर बराबर रहेको छ । २०२४ मा मात्र उनले आफ्नो सम्पत्तिमा २१.३ अर्ब डलर थपेका छन् भने बितेको २४ घण्टामा उनको सम्पत्ति १.३४ अर्ब डलरले बढेको छ ।