यी दुई कम्पनीको साधारण सभा आज बस्दै, कुन–कुन अजेण्डा हुँदैछन् पारित ?

काठमाण्डौ । आज नेपाल स्टक एक्सचेञ्ज(नेप्से)मा सूचीकृत २ वटा कम्पनीको साधारण सभा आज आयोजना हुँदैछ । आज साधारण सभा आयोजना गर्ने कम्पनीहरुमा सगरमाथा जलविद्युत कम्पनी र माई खोला हाईड्रोपावर रहेका छन् ।  

सगरमाथा जलविद्युत कम्पनी लिमिटेड

सगरमाथा जलविद्युत कम्पनीको साधारण सभा आज काठमाण्डौको शंखपार्कस्थित स्मार्ट दरबारमा बिहान ९ बजेदेखि सुरु हुनेछ । उक्त सभामा कम्पनीको सञ्चालक समितिद्वारा गत आवका लागि प्रस्तावित ४.७५ प्रतिशत बोनस सेयर र ०.२५ प्रतिशत नगद लाभांश(कर प्रयोजनका लागि) गरी कुल ५ प्रतिशत लाभांश वितरणको प्रस्ताव पारित गरिनेछ ।  

यस्तै बोनस सेयर वितरणपश्चात हुने कम्पनीको चुक्तापूँजी वृद्धि बमोजिम प्रबन्धपत्र र नियामावलीमा संशोधन गर्ने विशेष प्रस्ताव समेत पारित हुनेछ ।  

सभामा अन्य कम्पनीमा लगानी गर्ने, गत आर्थिक वर्षको वासलात,नाफा नोक्सान हिसाब तथा वार्षिक प्रतिवेदन पारित गर्ने, लेखापरीक्षकको प्रतिवेदनसहित गत चालु आर्थिक वर्षका लागि लेखापरीक्षको नियुक्ति र निजको पारिश्रमिक निर्धारण गर्ने प्रस्ताव समेत पारित गरिनेछ ।  

लाभांश वितरण तथा साधारणसभा प्रयोजनका लागि कम्पनीले गत कात्तिक २६ गते बुक क्लोज गरिसकेको छ । यसर्थ कात्तिक २१ गतेसम्म नेप्सेमा कारोबार भई कायम भएका सेयरधनीहरु मात्रै कम्पनीद्वारा प्रस्तावित लाभांश पाउन र सभामा सहभागी हुन योग्य हुनेछन् ।  

माई खोला हाईड्रोपावर

माई खोला हाईड्रोपावरको चौथो साधारण सभा काठमाण्डौको शंखपार्कमा रहेको स्मार्ट दरबारमा बिहान ९ बजेदेखि सुरु हुनेछ । कम्पनीले गत आवको मुनाफाबाट कुनै प्रकारको लाभांश घोषणा नगरेकाले सभामा लाभांशसँग सम्बन्धित कुनै पनि प्रस्ताव पेश हुनेछैन ।  

सभामा आर्थिक वर्ष २०८०/८१ को सञ्चालक समितिको प्रतिवेदन पारित गर्ने, लेखापरीक्षकको प्रतिवेदनसहित आव २०८०/८१ को वासलात, नाफा नोक्सान हिसाब तथा नगद प्रवाह विवरण लगायतका वार्षिक वित्तीय विवरणहरु उपर छलफल गरी स्वीकृत गर्ने र लेखापरीक्षण समितिको सिफारिस बमोजिम आर्थिक वर्ष २०८१/८२ का लागि बाह्य लेखापरीक्षक नियुक्त गर्ने र निजको पारिश्रमिक तोक्ने प्रस्ताव पारित गरिनेछ ।