भारतको केन्द्रीय बैंकद्वारा ब्याजदर यथावत राख्ने निर्णय, जीडीपी वृद्धिदर घटाईयो

काठमाण्डौ । भारतीय केन्द्रीय बैंक,रिजर्भ बैंक अफ इण्डिया(आरबीआई)’ले ब्याजदर स्थिर राख्ने निर्णय गरेको छ । आरबीआईका गभर्नर शक्तिकान्त दासले मौद्रिक नीति सार्वजनिक गर्दै रेपो रेटमा कुनै परिवर्तन नभएको जानकारी दिएका हुन् ।  

यससँगै भारतमा रेपो रेट ६.५० प्रतिशत नै कायम भएको छ । रेपो रेटमा परिवर्तन नभएको यो ११ औं पटक हो । आरबीआईले पछिल्लोपटक सन् २०२३ को फेब्रुअरी महिनामा रेपो रेट परिवर्तन गरेको थियो । त्यसबेला आरबीआईले रेपो रेट २५ बेसिक प्वइन्टले बढाएर ६.५० प्रतिशत पुर्याएको थियो । त्यसपश्चात हालसम्म रेपो रेटमा कुनै परिवर्तन भएको छैन ।  

आज सार्वजनिक भएको मौद्रिक नीतिमा महङ्गीलाई लक्षित गरी ऋणलाई केन्द्रीत गरिएको जनाइएको छ । त्यसैले रेपो रेटमा कुनै परिवर्तन गरिएको छैन ।  

गभर्नर शक्तिकान्त दासले सन् २०२४/२५का लागि अनुमानित जीडीपी वृद्धि घटाएर ६.६ प्रतिशत कायम गरेका छन् । जसमा तेस्रो त्रैमासमा ६.८ प्रतिशत र चौथौ त्रैमासमा ७.२ प्रतिशत रहने अनुमान गरिएको छ । यस्तै अर्को वर्षको पहिलो त्रैमासको वृद्धिदर ६.९ प्रतिशत र दोस्रो त्रैमासको ७.३ प्रतिशत रहने प्रक्षेपण गरिएको छ ।  

भारतीय केन्द्रीय बैंकले वित्त वर्ष २०२५ मा उपभोक्ता महङ्गाईदर ४.८ प्रतिशत रहने अनुमान गरेको छ ।  

यस्तै सीआरआर पनि ४.५ प्रतिशतबाट घटाएर ४ प्रतिशत कायम गरिएको छ । यसबाट बैंकहरुलाई राहत पुग्ने अनुमान गरिएको छ । यसका कारण बैंकहरुमा नगद प्रवाहको कमी हुने छैन । पछिल्लो समय भारतीय बैंकहरु नगदको समस्यासँग जुधिरहेका थिए । तर आरबीआईको यो निर्णयले तरलतामा कमी नआउने आँकलन गरिएको छ ।