एसएमई प्लेटफर्म पनि नेप्से ३० जस्तै बन्दै, तत्काल आउने छैन छाँटकाँट

काठमाण्डौ । नेपाल सरकारले मन्त्रीपरिषद्बाट पास गरेर पठाएको एसएमई प्लेटफर्म तत्काल आउने सम्भावना देखिएको छैन । नेप्सेस्थित उच्च स्रोतले दिएको जानकारी अनुसार एसएमईको लागि छुट्टै प्लेटफर्म निमार्ण गर्न नेप्सेनै अनिच्छुक देखिएको छ । खासगरि नेप्से धितोपत्र निष्कासन तथा कारोबार नियामवली २०८१ मा नै नेप्सेको असमति रहेको स्रोतले दाबी गरेको छ । यहि कारण लामो समयदेखि अन्यौलमा रहेको नेप्से ३० जस्तै एसएमई प्लेटफर्म पनि अन्यौलमा परेको हो ।  

नेप्सेका प्रवक्ता मूराहरी पराजुलीले दिएको जानकारी अनुसार यस विषयमा के कसरी सञ्चालन गर्ने भन्ने नेप्सेको सञ्चालक समितिमा छलफल हुँदै छ । प्रवक्ता पराजुलीले यसलाई छ्ुट्टै इन्डेक्स बनाउने वा हालको उप सूचकहरुमा एउटा समूह थप्ने भन्ने बिषयमा सञ्चालक समितिमा नै छलफल हुने पनि उनले जानकारी दिए ।

पराजुलीले अन्तराष्ट्रिय बजारमा एसएमई प्लेटफर्म स्टक एक्सचेञ्ज बाहेक बाहिरबाट पनि सञ्चालन हुनसक्ने पनि पराजुलीले जानकारी दिए । तर नेपालमा के कसरी सञ्चालनमा ल्याउने भन्ने विषयमा सञ्चालक समितिमा छलफल पछि मात्रै निश्चित हुने उनले जानकारी दिए ।  

एसएमईसम्बन्धी नियमावलीमा २५ करोड रुपैयाँभन्दा कम चुक्तापूँजी भएका कम्पनीहरुले छुट्टै प्लेटफर्ममार्फत सार्वजनिक निष्कासन गर्ने व्यबस्था गरेको छ । यस्ता कम्पनीहरुलाई चुक्तापूँजीको ३० देखि ४९ प्रतिशतसम्म सर्वसाधारण्मा आईपीओ जारी गर्न दिइने व्यवस्था गरिएको छ । सर्वसाधारणले यस्ता कम्पनीको आईपीओ भर्दा न्यूनतम ५ सय कित्ताका लागि आवेदन दिनु पर्नेछ ।  

नियमावली अनुसार लगातार ३ वर्षसम्म नाफामा रहेका एसएमई कम्पनीले प्रिमियम मूल्यमा समेत आईपीओ जारी गर्न पाउनेछन् । कम्पनीहरुले प्रारम्भिक सार्वजनिक निष्कासन गर्नु पूर्व प्रारम्भिक सार्वजनिक निष्कासन गरिने धितोपत्रको ५ प्रतिशत सोको निष्कासन तथा बिक्री प्रबन्ध सम्बन्धी कार्य गर्ने मर्चेन्ट बैंकरले र १५ प्रतिशत योग्य संस्थागत लगानीकर्ताले खरिद गरेको हुनु पर्नेछ ।