नेशनल लघुवित्तको एजीएम आज, लाभांश र एफपीओको अजेण्डा पारित हुने

STOCK MARKET
शुक्रबार, चैत्र १६,२०८० 07:20:04

काठमाण्डौ । नेशनल लघुवित्त वित्तीय संस्था लिमिटेडको १० औं वार्षिक साधारण सभा आज आयोजना हुँदैछ । संस्थाको फागुन १७ गतेको सञ्चालक समितिको बैठकको निर्णयअनुसार धुलिखेलमा रहेको धुलिखेल लज रिसोर्ट बिहान १०.३० बजे सभा आयोजना हुन लागेको हो ।

उक्त सभामा गत आर्थिक वर्षका लागि प्रस्ताव गरिएको ७.५ प्रतिशत बोनस सेयर र ७.५ प्रतिशत नगद लाभांश(कर प्रयोजनका लागि समेत)गरी कुल १५ प्रतिशत लाभांश वितरणको प्रस्ताव पारित गरिनेछ।

सभामा संस्थाको रजिष्टर्ड(केन्द्रिय कार्यालय)काठमाण्डौको बुढानिलकण्ठ नगरपालिका वडा न ८ मा स्थानान्तरण गर्ने,संस्थापक र सर्वसाधारण समूहको सेयर पूँजीको अनुपात क्रमशः७० र ३० प्रतिशत कायम गर्ने र बोनस सेयर वितरणपश्चात कायम हुने संस्थापक र सर्वसाधारण समूहको सेयरपूँजीको अनुपात मिलान गर्दा नपुग भएको सर्वसाधारण तर्फको जम्मा ६ लाख ६९ हजार ९००.२९ कित्ता थप सार्वजनिक निष्कासन(एफपीओ)मार्फत सेयर जारी गर्ने प्रस्ताव पारित गरिनेछ ।

यस्तै सभामा सञ्चालक समितिको तर्फबाट अध्यक्षद्वारा प्रस्तुत हुने आव २०७९/८० को वार्षिक प्रतिवेदनमाथि छलफल गरी पारित गरिनेछ। यस्तै सभामा लेखापरीक्षकको प्रतिवेदन सहितको २०८० असारमसान्तको वासलात, नाफा नोक्सान हिसाब नगद प्रवाह विवरण लगायतका अन्य वित्तीय विवरणहरुमाथि छलफल गरी पारित गरिनुका साथै संस्थापक समूहतर्फबाट ४ जना र सर्वसाधारण सेयरधनीका तर्फबाट २ जना सञ्चालको गरी कुल ६ जना सञ्चालको निर्वाचन गर्ने प्रस्ताव पारित गरिनेछ ।

लाभांस वितरण तथा साधारण सभा प्रयोजनका लागि संस्थाले फागुन ३० गतेदेखि चैत १६ गतेसम्म बुक क्लोज गर्ने निर्णय गरेको छ । यसर्थ फागुन २९ गतेसम्म कायम सेयरधनीहरु मात्रै संस्थाको लाभांश प्राप्त गर्न र सभामा सहभागी हुन योग्य हुनेछन् ।