डिजेल र मट्टितेलको मूल्य प्रतिलिटर ३ रुपैयाँले वृद्धि, पेट्रोल र ग्यासको यथावत्

काठमाण्डौ । नेपाल आयल निगमले डिजेल र मट्टितेलको खुद्रा बिक्री मूल्य प्रतिलिटर तीन रुपैयाँले वृद्धि गरेको छ। निगम सञ्चालक समितिको बैठकले गरेको निर्णयअनुसार बढेको मूल्य माघ १७ गतेको मध्यरातदेखि लागू हुने निगमले जनाएको छ।

मूल्य समायोजनपछि डिजेल र मट्टितेल पहिलो वर्गका लागि प्रतिलिटर १३६.५० रुपैयाँ , दोस्रो वर्गका लागि १३८ रुपैयाँ र तेस्रो वर्गका लागि १३९ रुपैयाँ कायम भएको छ। निगमका अनुसार चारआली, विराटनगर, जनकपुर, अमलेखगञ्ज, भलबारी, नेपालगञ्ज, धनगढी र वीरगञ्ज डिपो पहिलो वर्गमा, सुर्खेत र दाङ डिपो दोस्रो वर्गमा तथा काठमाण्डौ, पोखरा र दिपायल डिपो तेस्रो वर्गमा वर्गीकरण गरिएको छ। डिपोबाट १५ किलोमिटरसम्मको क्षेत्रमा सोही मूल्य लागू हुनेछ।

यता पेट्रोल र एलपी ग्यासको मूल्य भने यथावत् राखिएको निगमले स्पष्ट पारेको छ।

साथै, निगमले हवाई इन्धनको मूल्य घटाएको छ। आन्तरिकतर्फको हवाई इन्धनको मूल्य प्रतिलिटर एक रुपैयाँले घटाई १२७ रुपैयाँ कायम गरिएको छ भने अन्तर्राष्ट्रियतर्फ काठमाण्डौका लागि प्रतिकिलोलिटर अमेरिकी डलर सातले घटाएर ९६६ डलर कायम गरिएको छ।

इन्डियन आयल कर्पोरेशनबाट आज प्राप्त नयाँ खरिद मूल्यअनुसार पेट्रोलमा प्रतिलिटर १२ पैसा, डिजेल र मट्टितेलमा प्रतिलिटर चार.६६ रुपैयाँ तथा एलपी ग्यासमा प्रतिसिलिण्डर ४५.४९ रुपैयाँ वृद्धि भई आएको तथा हवाई इन्धनमा प्रतिलिटर १.०८ रुपैयाँ घटेर आएकाले खुद्रा बिक्री मूल्य समायोजन गरिएको निगमको भनाइ छ।