दुईतिहाईको सरकार बन्न रास्वपालाई २ सिटको अभाव, अन्य दलको कति ?

काठमाण्डौ । प्रतिनिधिसभा निर्वाचननको समातुपातिकतर्फको मतगणना सकिएसँगै राष्ट्रिय स्वतन्त्र पार्टी (रास्वपा)लाई दुई तिहाईको सरकार बनाउन झण्डै दुई सिटको अभाव देखिने भएको छ ।  

आगामी संसदको सम्भावित अंकगणित गर्दा रास्वपाले प्रत्यक्षतर्फ जितेको १२५ सिट र समानुपातिकतर्फको मतको आधारमा पाउन सक्ने ५७ सिट गरी रास्वपाले कुल १८२ सिट पाउने देखिएको छ, तर निर्वाचन आयोगले सिट निर्धारण भने गरिसकेको छैन ।  

निर्वाचन आयोगले सिट विभाजनका लागि प्रयोग गर्ने सेन्ट लग फमूर्लाको आधारमा प्रत्यक्षतर्फ र समानुपातिकतर्फ प्राप्त गरेको मतको आधारमा रास्वपाले १८२ सिट प्राप्त गर्ने देखिएको छ ।  

यदि आयोगले यहि सिट संख्या कायम गर्यो भने प्रतिनिधिसभामा रास्वपाको दुई तिहाइका लागि २ सिट नपुग्ने देखिन्छ । २७५ सदस्यीय प्रतिनिधि सभामा दुई तिहाइका लागि १८४ सिट आवश्यक पर्छ ।  

आयोगका अनुसार रास्वपाले समानुपातिकतर्फ ५१ लाख ५४ हजार ९४८ मत प्राप्त गरेको छ, जुन यो कुल मतको ४७.८१ प्रतिशत मत हो ।  

दोस्रोमा नेपाली कांग्रेसले समानुपातिकमा २० सिट पाउने देखिएको छ । कांग्रेसले प्रत्यक्षमा १८ सिट जितेको छ । यसरी कांग्रेसले कुल ३८ सिट पाउने देखिएको हो । यसअघि कांग्रेसले ८९ वटा सिट प्राप्त गरेको थियो ।  

त्यस्तै, तेस्रोमा नेकपा एमालेले समातुपातिकमा १६ सिट र प्रत्यक्षतर्फ जितेको ९ सिट गरी कुल २५ वटा सिट पाउने देखिएको छ । यता नेपाल कम्युनिष्ट पार्टीले समानुपातिकमा ९ वटा र प्रत्यक्षतर्फ जितेको ८ सिट गरी कुल १७ सिट पाउने देखिएको छ ।  

श्रम संस्कृति पार्टी र राप्रपाले भने समानुपातिकबाट ४÷४ वटा सिट पाउने देखिएको छ । श्रम संस्कृतिले प्रत्यक्षतर्फ जितेको ३ सिट गरी ७ वटा सिट पाउने देखिन्छ भने राप्रपाले प्रत्यक्षतर्फ जितेको १ सिट गरेर कुल ५ वटा सिट पाउने देखिएको छ ।