फुल गियरमा गृह प्रशासन: एकान्तकुनामा ‘बिचौलिया क्लिनअप’, १५ जना नियन्त्रणमा

काठमाण्डौ । सेवाग्राहीमाथि हुने हैरानी र अवैध असुली नियन्त्रण गर्न गृह प्रशासन फुल गियरमा उत्रिएको छ। सोही अभियानअन्तर्गत यातायात कार्यालय एकान्तकुनाबाट १५ जना बिचौलियालाई प्रहरीले नियन्त्रणमा लिएको छ।

जिल्ला प्रहरी परिसर ललितपुर र प्रहरी वृत्त सातदोबाटोको संयुक्त टोलीले ‘स्पट अपरेशन’ सञ्चालन गर्दै सेवाग्राहीलाई छिटो काम गरिदिने बहानामा रकम असुल्ने समूहलाई समातेको हो। कार्यालय परिसरमै सक्रिय भएर ‘फास्ट ट्रयाक’को नाममा सेवाग्राहीलाई दुःख दिने गरेको गुनासो बढेपछि प्रहरीले निगरानी बढाएर कारबाही अघि बढाएको जनाएको छ।

पक्राउ परेकाहरूलाई अहिले प्रहरी वृत्त सातदोबाटोमा राखेर विस्तृत अनुसन्धान भइरहेको ललितपुर प्रहरीका एसपी तथा प्रवक्ता गौतम मिश्रले जानकारी दिएका छन्।

प्रहरी स्रोतका अनुसार पछिल्लो समय सार्वजनिक सेवा कार्यालयहरूमा बिचौलियाको प्रभाव बढ्दै गएपछि यस्तो ‘क्लिनअप अपरेशन’ सुरु गरिएको हो। अब अन्य कार्यालयहरूमा पनि यस्तै निगरानी र कारबाही विस्तार हुने संकेत गरिएको छ।