ईरानलाई दुष्ट राष्ट्रको संज्ञा दिँदै ट्रम्पले भने, ‘एकै रातमा ध्वस्त बनाउन सक्छौं’

काठमाण्डौ । अमेरिकी राष्ट्रपति डोनाल्ड ट्रम्पले ईरानप्रति कडा अभिव्यक्ति दिँदै उक्त देशलाई दुष्ट राष्ट्रको संज्ञा दिएका छन्। सोमबार आयोजित पत्रकार सम्मेलनमा उनले ईरानलाई लक्षित गर्दै आवश्यक परे एकै रातमा समाप्त गर्न सकिने चेतावनीसमेत दोहोर्‍याएका छन्।

ट्रम्पले तेहरानले कूटनीतिक सहमति नगरेमा तथा विश्वव्यापी तेल आपूर्तिका लागि अत्यन्त महत्वपूर्ण जलमार्ग स्ट्रेट अफ हर्मुज पुनः सञ्चालनमा नल्याएमा अमेरिका ईरानका महत्वपूर्ण पूर्वाधारहरू—जस्तै विद्युत् केन्द्र, पुल तथा अन्य संरचनामाथि आक्रमण गर्न बाध्य हुने बताएका छन्।

उनले भने, ‘अमेरिकासँग अझै धेरै विकल्पहरू छन्। हामी पछि हट्न सक्छौं, तर ईरानलाई पुनः आफ्नो शक्ति निर्माण गर्न दशकौं लाग्न सक्छ। हाम्रो उद्देश्य उसलाई परमाणु शक्ति बन्नबाट रोक्नु हो।’

यता ईरानले भने अमेरिकी प्रस्तावित ४५ दिने अस्थायी युद्धविराम औपचारिक रूपमा अस्वीकार गरेको छ। तेहरानको भनाइ अनुसार स्थायी समाधानबिना अस्थायी सम्झौता स्वीकार्य नहुने स्पष्ट गरिएको छ।

दुवै देशबीचको तनाव गत फेब्रुअरी अन्त्यदेखि तीव्र बन्दै गएको छ। अमेरिकी पक्षले ईरानको सैन्य क्षमता कमजोर भइसकेको दाबी गर्दै सीमित मिसाइल र ड्रोन मात्र बाँकी रहेको जनाएको छ। साथै, हालै ईरानबाट दुई अमेरिकी पाइलटको उद्धार गरिएको उल्लेख गर्दै ट्रम्पले अमेरिकी सैन्य क्षमताको उदाहरण प्रस्तुत गरेका छन्।

अन्तर्राष्ट्रिय समुदायले भने बढ्दो तनावप्रति चिन्ता व्यक्त गर्दै दुवै पक्षलाई संयम अपनाउन र कूटनीतिक समाधान खोज्न आग्रह गरिरहेको छ।