उपत्यकामा २४ घण्टामा दुई हजारभन्दा बढी चालक कारबाहीमा, २२ लाखभन्दा बढी राजस्व सङ्कलन

काठमाण्डौं । पछिल्लो २४ घण्टामा काठमाडौँ उपत्यकामा ट्राफिक नियम उल्लङ्घन गर्ने दुई हजार ३४ जना सवारी चालक कारबाहीमा परेका छन् ।  

काठमाडौँ उपत्यका ट्राफिक प्रहरी कार्यालय का अनुसार कारबाहीबाट २२ लाख १२ हजार रुपैयाँ राजस्व सङ्कलन भएको छ ।

ट्राफिक प्रहरीले मादक पदार्थ सेवन गरेर सवारी चलाउने १४० जना, नियमविपरीत ‘राइड सेयरिङ’ सञ्चालन गर्ने १८४ जना, ट्राफिक बत्ती तथा सङ्केत उल्लङ्घन गर्ने ८७ जना र तीव्र गतिमा सवारी चलाउने २१० जनामाथि कारबाही गरेको जनाएको छ ।

त्यस्तै लेन अनुशासन उल्लङ्घन गर्ने १२० जना, निषेधित क्षेत्रमा हर्न बजाउने ५७ जना, सडक पेटीमा पार्किङ गर्ने ९६ जना, एकतर्फी सडकमा सवारी चलाउने ११० जना तथा अन्य ट्राफिक नियम उल्लङ्घन गर्ने एक हजार २९ जना पनि कारबाहीमा परेका छन् ।

ट्राफिक प्रहरीले उपत्यकामा सवारी दुर्घटना न्यूनीकरण तथा सडक अनुशासन कायम गर्न नियमित अनुगमन र चेकजाँचलाई कडाइ गरिएको जनाएको छ ।