बजेट अधिवेशन सोमबारदेखि, सरकारको वार्षिक ‘रोडम्याप’ संसद्मा प्रस्तुत हुँदै

काठमाण्डौ । संघीय संसद्को चालु वर्षको सबैभन्दा महत्त्वपूर्ण अधिवेशन मानिएको बजेट अधिवेशन सोमबारदेखि सुरु हुँदैछ । अधिवेशनको पहिलो दिन नै सरकारले आगामी आर्थिक वर्षका लागि आफ्नो नीति तथा कार्यक्रम सार्वजनिक गर्ने तयारी गरेको छ ।

राष्ट्रपति रामचन्द्र पौडेलले संघीय संसद्का दुवै सदनको संयुक्त बैठकलाई सम्बोधन गर्दै अपराह्न ४ बजे सरकारको नीति तथा कार्यक्रम प्रस्तुत गर्ने कार्यतालिका तय गरिएको संसद् सचिवालयले जनाएको छ।

संविधानको धारा ९५ अनुसार प्रत्येक वर्षको पहिलो अधिवेशन प्रारम्भ भएपछि राष्ट्रपतिले प्रतिनिधिसभा र राष्ट्रियसभाको संयुक्त बैठकलाई सम्बोधन गर्नुपर्ने संवैधानिक व्यवस्था छ । यही व्यवस्थाअनुसार सरकारको आगामी वर्षको प्राथमिकता, विकास रणनीति र नीतिगत दिशा संसद्मार्फत सार्वजनिक हुन लागेको हो ।

संसद् सचिवालयले संयुक्त बैठकमा सहभागी हुन प्रतिनिधिसभा र राष्ट्रियसभाका सदस्यलाई अपराह्न ३:४५ बजेसम्म संसद् भवनमा उपस्थित हुन आग्रह गरेको छ । त्यसअघि दिउँसो २ बजे दुवै सदनको छुट्टाछुट्टै बैठक बस्ने कार्यक्रम छ ।

सोमबारको प्रतिनिधिसभा बैठकमा राष्ट्रपतिबाट अधिवेशन आह्वानसम्बन्धी पत्र पढेर सुनाइने, मन्त्रिपरिषद् हेरफेरसम्बन्धी जानकारी सदनलाई गराइने तथा सभामुख अनुपस्थित हुँदा बैठक सञ्चालन गर्ने सदस्यहरूको मनोनयनसम्बन्धी प्रक्रिया अघि बढाइने सम्भावित कार्यसूची रहेको छ ।

त्यसैगरी, प्रतिनिधिसभा नियमावली–२०७९ अन्तर्गत जारी गरिएको ‘बाधा अड्काउ फुकाउ’ आदेश अनुमोदनका लागि प्रस्तुत गरिनेछ भने नियमावलीको मस्यौदामाथि पनि प्रक्रिया अघि बढाइने संसद् सचिवालयले जनाएको छ ।

अधिवेशनको पहिलो दिन सरकारले विभिन्न विवादित तथा चासोका अध्यादेशहरू पनि संसद्मा पेश गर्ने तयारी गरेको छ । सार्वजनिक खरिद ऐन संशोधनदेखि संवैधानिक परिषद्सम्बन्धी अध्यादेशसम्म गरी आठ अध्यादेश प्रतिनिधिसभा र राष्ट्रियसभामा टेबल गरिने कार्यसूची छ ।

यसपटकको बजेट अधिवेशनलाई सरकारले आर्थिक सुधार, लगानी विस्तार, निजी क्षेत्रको मनोबल उकास्ने नीति तथा सुस्त अर्थतन्त्र चलायमान बनाउने दिशामा केन्द्रित गर्ने अपेक्षा गरिएको छ ।