११ अर्बको मस्र्याङ्दी बेसी आयोजना निर्माणतर्फ, सिटिजन्स बैंक अगुवा लगानीकर्ता

काठमाण्डौ । सिटिजन्स बैंक इन्टरनेशनल लिमीटेडको अगुवाइमा ५० मेगावाट क्षमताको मस्र्याङ्दी बेसी जलविद्युत आयोजनामा ७ अर्ब ५० करोड रुपैयाँ ऋण लगानी हुने भएको छ । सहवित्तीयकरण मोडलमार्फत लगानी जुटाइने उक्त आयोजनाका लागि प्रवर्द्धक कम्पनी दिब्यज्योती हाइड्रोपावर लिमिटेड र लगानीकर्ता बैंकहरूबीच बुधबार वित्तीय व्यवस्थापनसम्बन्धी कर्जा सम्झौतामा हस्ताक्षर भएको हो ।

गण्डकी प्रदेशको लमजुङ जिल्लास्थित मस्र्याङ्दी गाउँपालिका र बेसीशहर नगरपालिकामा निर्माण हुने उक्त आयोजनाको कुल अनुमानित लागत करिब ११ अर्ब ३० करोड रुपैयाँ रहेको छ । परियोजनामा ६७ प्रतिशत ऋण र ३३ प्रतिशत स्वपुँजीको संरचनामा वित्तीय व्यवस्थापन गरिएको बैंकले जनाएको छ ।

आयोजना आगामी चार वर्षभित्र निर्माण सम्पन्न गरी विद्युत उत्पादन गर्ने लक्ष्य राखिएको छ । उत्पादन हुने विद्युत नेपाल विद्युत प्राधिकरणको उदीपुर सबस्टेशनमा जोडिनेछ । कम्पनीका अनुसार आयोजनाबाट हिउँदमा ११२.०९९ गिगावाट घण्टा र वर्षायाममा २००.५०३ गिगावाट घण्टा गरी वार्षिक ३१२.६०२ गिगावाट घण्टा विद्युत उत्पादन हुनेछ ।

सम्झौता कार्यक्रममा बोल्दै सिटिजन्स बैंकका प्रमुख कार्यकारी अधिकृत गणेशराज पोखरेलले बैंकले स्थापना कालदेखि नै जलविद्युत तथा हरित ऊर्जा क्षेत्रमा एकल लगानी, अगुवा बैंक तथा सहवित्तीयकरणमार्फत सक्रिय भूमिका खेल्दै आएको बताए । उनले बैंकिङ क्षेत्र र स्वतन्त्र ऊर्जा उत्पादकहरूको संयुक्त लगानीले देशको ऊर्जा विकासमा निजी क्षेत्रको योगदान उल्लेखनीय रहेको धारणा राखे ।

पोखरेलका अनुसार बैंकको हालसम्म निर्माण सम्पन्न भइसकेका २७४.४०१ मेगावाट क्षमताका १६ आयोजना तथा निर्माणाधीन १,३३०.८२५ मेगावाट क्षमताका २६ आयोजना गरी कुल १,६०५.२२६ मेगावाट क्षमताका ४२ जलविद्युत आयोजनामा लगानी रहेको छ ।

बैंकले १८ वटा आयोजनामा अगुवा बैंक, ३ वटा आयोजनामा सहअगुवा बैंक, १७ वटा आयोजनामा सहभागी बैंक तथा ४ वटा आयोजनामा एकल लगानीकर्ता बैंकका रूपमा भूमिका निर्वाह गरिरहेको जनाएको छ । प्रदेशगत रूपमा कोशीमा ५२१.६६६ मेगावाट, बागमतीमा ३९३.८२५ मेगावाट, गण्डकीमा ६१६.४६५ मेगावाट, लुम्बिनीमा ५३.०२ मेगावाट र कर्णालीमा २०.२५ मेगावाट क्षमताका आयोजनामा बैंकको लगानी रहेको छ।

दिब्यज्योती हाइड्रोपावर लिमिटेडका अध्यक्ष सतीस न्यौपानेले आयोजनाको निर्माण कार्य तत्काल सुरु हुने र चार वर्षभित्र सम्पन्न गर्ने लक्ष्य रहेको बताए । उनले नेपाल विद्युत प्राधिकरण, विद्युत विकास विभाग, वन तथा वातावरण मन्त्रालयलगायत निकायबाट आवश्यक कानुनी प्रक्रिया पूरा भइसकेकाले आयोजना समयमै सम्पन्न हुने विश्वास व्यक्त गरे ।

ऊर्जा क्षेत्रमा लगानी विस्तारसँगै सिटिजन्स बैंक डिजिटल बैंकिङ सेवामा पनि आक्रामक रूपमा अघि बढिरहेको छ । बैंकले ‘सिटिजन्स फोनपे क्रेडिट कार्ड’, ‘सिटिजन्स जेन–जी सेभिङ अकाउन्ट’ तथा ‘सिटिजन्स डिजी बैंक सेवा’ जस्ता नवीन सेवा सञ्चालनमा ल्याइसकेको छ । फ्रिलान्सर लक्षित विशेष बचत खातादेखि मोबाइल बैंकिङ एपमार्फत शेयर आवेदन र सीआरएन सेवा लिन सकिने सुविधा समेत बैंकले सुरु गरेको जनाएको छ ।

हाल सिटिजन्स बैंकले देशभर ६१ जिल्लामा रहेका २०० शाखा, १६९ एटीएम, ३ विस्तारित काउन्टर तथा ४२ शाखारहित बैंकिङ इकाइमार्फत २० लाखभन्दा बढी ग्राहकलाई आधुनिक बैंकिङ सेवा प्रदान गर्दै आएको छ ।