नेपालको डिजिटल पूर्वाधारमा नयाँ फड्को: एनसेल डाटा सेन्टरले पायो विश्वस्तरीय ‘टियर-३’ प्रमाणीकरण

काठमाण्डौ । नेपालको डिजिटल पूर्वाधार विकासमा महत्वपूर्ण उपलब्धि हासिल गर्दै एनसेल बिजनेसको नख्खुस्थित अत्याधुनिक डाटा सेन्टरले अन्तर्राष्ट्रिय स्तरको प्रतिष्ठित ‘एएनएसआई/टीआईए–९४२–सी रेटेड–३ डिजाइन एन्ड कन्स्ट्रक्टेड फसिलिटी सर्टिफिकेशन’ प्राप्त गरेको छ। यो प्रमाणीकरणसँगै एनसेल डाटा सेन्टर नेपालमै विश्वस्तरीय विश्वसनीयता, सुरक्षा र निरन्तर सेवा उपलब्ध गराउने क्षमतायुक्त पूर्वाधारको रूपमा स्थापित भएको छ।

एनसेलका अनुसार यो मान्यता प्राप्त गर्ने एनसेल डाटा सेन्टर नेपालकै पहिलो ‘डिजाइन एन्ड कन्स्ट्रक्टेड फसिलिटी’ बनेको छ। यसअघि नै सरकारद्वारा सूचीकृत नेपालको पहिलो डाटा सेन्टर तथा क्लाउड सेवा प्रदायकको पहिचान बनाएको एनसेलले यो नयाँ उपलब्धिसँगै नेपालको डिजिटल इकोसिस्टममा आफ्नो भूमिका थप मजबुत बनाएको छ।

९९.९८२ प्रतिशत उपलब्धता, सेवा अवरुद्ध हुने जोखिम न्यून

‘रेटेड–३’ प्रमाणीकरणले डाटा सेन्टरको पूर्वाधार उच्च उपलब्धता (High Availability), अतिरिक्त सुरक्षा प्रणाली (Redundancy) र विपद् वा प्राविधिक समस्यापछि छिटो पुनः सञ्चालनमा फर्किने क्षमतायुक्त रहेको पुष्टि गर्दछ।

यस स्तरको डाटा सेन्टरमा विद्युत् आपूर्ति, कुलिङ सिस्टम र नेटवर्क पूर्वाधार पूर्ण रूपमा ब्याकअपसहित सञ्चालन हुने भएकाले नियमित मर्मतसम्भार वा आकस्मिक समस्या हुँदा पनि सेवा बन्द गर्नुपर्ने अवस्था आउँदैन। एनसेलका अनुसार यो डाटा सेन्टर करिब ९९.९८२ प्रतिशत अपटाइम सुनिश्चित गर्ने गरी डिजाइन गरिएको छ, जुन बैंकिङ, वित्तीय कारोबार, सरकारी प्रणाली तथा अन्य संवेदनशील डिजिटल सेवाका लागि अत्यन्त महत्वपूर्ण मानिन्छ।

‘नेपालकै लागि कोसेढुङ्गा’

एनसेलका प्रमुख कार्यकारी अधिकृत (सीईओ) माइकल फोलेले यो उपलब्धि कम्पनी मात्र नभई नेपालकै लागि ऐतिहासिक उपलब्धि भएको बताएका छन्।

उनका अनुसार नेपालबाट पहिलोपटक ‘टीआईए डिजाइन एन्ड कन्स्ट्रक्टेड फसिलिटी’ प्रमाणीकरण प्राप्त हुनु देशको डिजिटल पूर्वाधार विकासको महत्वपूर्ण संकेत हो। उनले विश्वस्तरीय डिजिटल सेवा उपलब्ध गराउँदै स्थानीय व्यवसायलाई आत्मनिर्भर बनाउने तथा सरकारको डिजिटल रूपान्तरण अभियानलाई सहयोग गर्ने प्रतिबद्धता पनि व्यक्त गरे।

फोलेका अनुसार अब बैंक, वित्तीय संस्था, बीमा कम्पनी, सरकारी निकाय तथा अन्य संवेदनशील क्षेत्रका संस्थाहरूले आफ्नो महत्वपूर्ण डेटा नेपालमै सुरक्षित रूपमा होस्ट गर्न सक्ने वातावरण थप बलियो बनेको छ।

बैंकदेखि सरकारी प्रणालीसम्मलाई प्रत्यक्ष लाभ

यो प्रमाणीकरणले विशेषगरी बैंक तथा वित्तीय संस्था, बीमा कम्पनी, सरकारी निकाय, साना तथा मझौला उद्योग र ठूला कर्पोरेट ग्राहकहरूलाई प्रत्यक्ष लाभ पुग्ने अपेक्षा गरिएको छ।

डाटा सेन्टरको उच्च विश्वसनीयताले बैंकिङ कारोबार, इन्टरप्राइज रिसोर्स प्लानिङ (ERP), डिजिटल भुक्तानी प्रणाली, क्लाउड सेवा, ई–गभर्नेन्स तथा अन्य महत्वपूर्ण अनलाइन सेवाहरूमा डाउनटाइम न्यून बनाउन मद्दत गर्नेछ। साथै नियामकीय अडिट, कम्प्लाएन्स तथा डेटा सुरक्षासम्बन्धी आवश्यकताहरू पूरा गर्न पनि सहज हुने बताइएको छ।

साइबर जोखिम र विपद् व्यवस्थापनमा थप सुरक्षा

एनसेलका अनुसार ‘रेटेड–३’ डिजाइनमा बहुस्तरीय ब्याकअप प्रणाली, अतिरिक्त नेटवर्क संरचना तथा विपद् पुनःस्थापना (Disaster Recovery) क्षमता समावेश छ। यसले साइबर आक्रमण, विद्युत् अवरोध, प्राकृतिक विपत्ति वा अन्य आकस्मिक घटनाका बेला पनि व्यवसायलाई निरन्तर सञ्चालनमा रहन सहयोग पुर्‍याउँछ।

विशेषज्ञहरूका अनुसार डिजिटल अर्थतन्त्र विस्तार हुँदै गइरहेको वर्तमान अवस्थामा यस्ता पूर्वाधारले मुलुकको डेटा सार्वभौमिकता (Data Sovereignty) सुदृढ बनाउने, विदेशी डाटा सेन्टरमाथिको निर्भरता घटाउने तथा नेपाललाई क्षेत्रीय डिजिटल हबका रूपमा विकास गर्न आधार तयार पार्नेछन्।

अन्तर्राष्ट्रिय मापदण्डको श्रृंखला

एनसेल डाटा सेन्टरले यसअघि नै सूचना सुरक्षा व्यवस्थापनका लागि आईएसओ २७००१, गोपनीयता व्यवस्थापनका लागि आईएसओ २७७०१, गुणस्तर व्यवस्थापनका लागि आईएसओ ९००१ तथा वातावरण व्यवस्थापनका लागि आईएसओ १४००१ प्रमाणीकरण प्राप्त गरिसकेको छ।

यसले एनसेलले डेटा सुरक्षा, सेवा गुणस्तर, जोखिम व्यवस्थापन र वातावरणीय दायित्वका क्षेत्रमा अन्तर्राष्ट्रिय मापदण्डलाई निरन्तर आत्मसात गर्दै आएको संकेत गर्दछ।

नेपाल डिजिटल अर्थतन्त्रतर्फ तीव्र गतिमा अघि बढिरहेका बेला एनसेल डाटा सेन्टरले प्राप्त गरेको यो विश्वस्तरीय प्रमाणीकरणलाई देशको डिजिटल पूर्वाधार सुदृढीकरणतर्फको अर्को महत्वपूर्ण उपलब्धिका रूपमा हेरिएको छ।