रास्वपा सभापतिसँग कुरा नमिलेपछि सभामुख र विपक्षी दल छलफलमा

काठमाण्डौ । प्रतिनिधिसभाको जारी गतिरोध अन्त्य गर्ने प्रयासस्वरूप सभामुख डीपी अर्याल र विपक्षी दलका नेताहरूबीच सिंहदरबारमा छलफल भइरहेको छ ।

सभामुखको कार्यकक्षमा जारी छलफलमा विपक्षी दलका प्रतिनिधिहरू सहभागी रहेको नेकपा एमालेका प्रमुख सचेतक ऐन महरले जानकारी दिएका छन् । 

प्रमुख सचेतक महरका अनुसार रास्वपा सभापति रवि लामिछानेसँगको अघिल्लो छलफलमा सहमति नजुटेपछि अहिले सभामुखसँग पुनः वार्ता भइरहेको हो ।

यसअघि सभामुखसँगको करिब दुई घण्टा लामो छलफलमा पनि पक्षहरूबीच सहमति बन्न सकेको थिएन ।

छलफलमा विपक्षी दलहरूले सीमा सम्बन्धी विषयमा प्रधानमन्त्रीले दिएको अभिव्यक्तिबारे परराष्ट्रमन्त्रीमार्फत लिखित जवाफ संसद्मा प्रस्तुत गर्नुपर्ने प्रस्ताव अघि सारेका थिए ।  

सो प्रस्ताव स्वीकार भए संसद्को अवरोध हटाउन आफूहरू तयार रहने उनीहरूको भनाइ थियो ।

तर, रास्वपा सभापति रवि लामिछानेले भने प्रधानमन्त्रीको तर्फबाट होइन, परराष्ट्रमन्त्रीले नै आफ्नै शैलीमा जवाफ दिन सकिने धारणा राखेपछि विपक्षी दलहरू असन्तुष्ट बनेका थिए ।  

सो विषयमा सहमति नजुट्दा संसद् बैठक प्रभावित भएको हो ।

त्यसैको परिणामस्वरूप बिहान ११ बजेका लागि बोलाइएको प्रतिनिधिसभा बैठक सूचना टाँस गरी दिउँसो २ बजेसम्मका लागि स्थगित गरिएको थियो ।

तर, २ बजेका लागि सारिएको बैठक पनि समाचार तयार पार्दासम्म शुरु हुन सकेको छैन ।