वाणिज्य बैंकहरुले कमाए रु.५६.४७ अर्ब नाफा, कुनले कति ?

काठमाण्डौ । वाणिज्य बैंकहरुले साढे ५६ अर्ब रुपैयाँ नाफा कमाएका छन् । नेपाल राष्ट्र बैंकका अनुसार चालु आवको १० महिनासम्ममा २० वाणिज्य बैंकले ५६ अर्ब ४७ करोड ५० लाख रुपैया नाफा कमाएका हुन् ।  

यो नाफा गत आवको सोही अवधिसम्मको तुलनामा १८.१६ प्रतिशत बढी हो । गत आवको वैशाख महिनासम्ममा वाणिज्य बैंकहरुले ४७ अर्ब ७९ करोड ४७ लाख रुपैयाँ नाफा कमाएका थिए ।  

सो अवधिसम्ममा १३ बैंकको नाफा बढेको छ भने ७ बैंकको नाफा गत आवको तुलनामा घटेको छ ।  

बैंकहरुको कर्जा व्यवस्थापनमा सुधार, संचालन खर्च नियन्त्रणसँगै केहीको खराब कर्जा अनुपातमा सुधार देखिएसँगै समग्रमा बैंकहरुको नाफामा सुधार देखिएको हो ।  

सो अवधिसम्म सर्वाधिक नाफा कमाउनेमा भने नबिल बैंक रहेको छ । बैंकले पछिल्लो १० महिनामा नाफा ३६.३७ प्रतिशतले बढाएर ७ अर्ब ६६ करोड ९६ लाख रुपैयाँ कमाएको छ । बैंकले गत आवको सोही अवधिसम्म ५ अर्ब बढी नाफा कमाएको थियो ।  

त्यस्तै दोस्रो बढी नाफा कमाउनेमा ग्लोबल आइएमई बैंक रहेको छ । यो बैंकले ५ अर्ब १९ करोड रुपैयाँ नाफा कमाएको छ । बैंकको नाफा ३.०७ प्रतिशतले घटेको छ ।  

त्यस्तै, कु्मारी बैंकले ४ अर्ब ४९ करोड रुपैयाँ, राष्ट्रिय वाणिज्य बैंकले ३ अर्ब २१ करोड रुपैयाँ, नेपाल इन्भेष्टमेन्ट मेगा बैंकले ३ अर्ब ८० करोड, एभरेष्ट बैंकले ३ अर्ब ७० करोड, प्राइम कमर्सियल बैंकले ३ अर्ब ४० करोड, एनएमबि बैंकले ३ अर्ब १४ करोड, नेपाल बैंकले २ अर्ब ९८ करोड, सानिमा बैंकले २ अर्ब ६८ करोड, लक्ष्मी सनराइज बैंकले २ अर्ब ४६ करोड, सिद्धार्थ बैंकले २ अर्ब ३८ करोड र स्ट्याण्डर्ड चार्टड बैंकले २ अर्ब ३५ करोड रुपैयाँ नाफा कमाएको छ ।  

यसका साथै माछापुच्छ्रे बैंकले १ अर्ब ८८ करोड, नेपाल एसबिआई बैंकले १ अर्ब ६८ करोड, कृषि विकास बैंकले १ अर्ब ५९ करोड, सिटिजन्स बैंकले १ अर्ब ४९ करोड, प्रभु बैंकले १ अर्ब १६ करोड रुपैयाँ, हिमालयन बैंकले ८० करोड २८ लाख रुपैयाँमा र एनआइसी एशिया बैंकले ३३ करोड रुपैयाँ नाफा कमाएको छ ।  

गत आवको तुलनामा सबैभन्दा बढी नाफा वृद्धि गर्नेमा कुमारी बैंक रहेको छ । बैंकले ८३३ प्रतिशतले नाफा ग्रोथ गरेको छ ।  

सर्वाधिक घट्नेमा भने प्रभु बैंक रहेको छ । यो बैंकको नाफा ४१.७० प्रतिशतलते घटेको छ।