विश्वकपमा स्वीडेनको शानदार सुरुवात, ट्युनिसिया ५–१ ले पराजित

काठमाण्डौ । फिफा विश्वकप २०२६ अन्तर्गत समूह ‘एफ’ को खेलमा स्वीडेनले ट्युनिसियामाथि ५–१ को प्रभावशाली जित दर्ता गर्दै प्रतियोगितामा दमदार सुरुवात गरेको छ।

खेलको मुख्य आकर्षण युवा मिडफिल्डर यासिन आयारी बने, जसले खेलको सातौँ मिनेटमै दायाँ खुट्टाले ३० यार्ड टाढाबाट प्रहार गरेको शक्तिशाली र सुन्दर गोलमार्फत स्वीडेनलाई अग्रता दिलाए। ट्युनिसियाली मूलसमेत रहेका आयारीले गोलपछि कुनै उत्सव नगरी सम्मानस्वरूप शान्त प्रतिक्रिया जनाएका थिए।

स्वीडेनका आक्रमण जोडी अलेक्जेन्डर इसाक र भिक्टर योकेरेसले पनि उत्कृष्ट प्रदर्शन गर्दै टोलीको जितलाई सहज बनाए। इसाकले ३० औँ मिनेटमा गोल गर्दै अग्रता दोब्बर बनाए भने दोस्रो हाफमा उनले नै योकेरेसका लागि गोल असिस्ट गरेका थिए।

ट्युनिसियाले पहिलो हाफको अन्त्यतिर ओमार रेकिक को हेडरमार्फत खेलमा फर्कने प्रयास गरे पनि स्वीडेनले दोस्रो हाफमा पूर्ण नियन्त्रण लियो। भिडियो असिस्टेन्ट रेफ्री (भीएआर) समीक्षा पछि म्याटियास स्वानबर्ग ले चौथो गोल थपे।

खेलको अन्त्यतिर आयारीले आफ्नो दोस्रो गोल गर्दै स्वीडेनको फराकिलो जित ५–१ मा पुर्याए। यस जितसँगै स्वीडेन समूह ‘एफ’ को शीर्ष स्थानमा पुगेको छ भने ट्युनिसियालाई अर्को चरण पुग्न कठिन चुनौती सामना गर्नुपर्ने भएको छ।