‘अपरेसन सिन्दूर’का शहिद सैनिकबारे विवाद, रक्षा मन्त्रालयको स्पष्टीकरण

काठमाण्डौ । ‘अपरेसन सिन्दूर’का क्रममा ज्यान गुमाएका ६ जना सैनिकको पहिचान र उनीहरूको शहादत सार्वजनिक गर्ने प्रक्रियालाई लिएर राजनीतिक विवाद चर्किएको छ।  

विपक्षी पक्षले सरकारमाथि पाकिस्तानविरुद्धको अपरेसनमा मारिएका सैनिकहरूको शहादत लुकाइएको आरोप लगाएको छ।

विवाद चुलिएपछि रक्षा मन्त्रालयले आधिकारिक विज्ञप्ति जारी गर्दै सबै ६ जना सैनिकलाई राष्ट्रका ‘नायक’ भन्दै उनीहरूको साहस, कर्तव्यनिष्ठा र सर्वोच्च बलिदान सधैं प्रेरणादायी रहने स्पष्ट पारेको छ।

मन्त्रालयका अनुसार केही सञ्चारमाध्यम र सामाजिक सञ्जालमा शहिद सैनिकहरूको सम्मान वा मान्यता हालै मात्र सार्वजनिक गरिएको भन्ने दाबी गरिएको छ, तर त्यो तथ्यगत रूपमा सही नभएको जनाएको छ।  

मन्त्रालयले ११ मे २०२५ मा संयुक्त सैन्य पत्रकार सम्मेलनमै तात्कालीन डीजीएमओ लेफ्टिनेन्ट जनरल राजीव घईले उनीहरूको बलिदानप्रति श्रद्धाञ्जली अर्पण गरिसकेको स्पष्ट पारेको छ।

त्यसपछि उनीहरूलाई वीरता सम्मानसमेत प्रदान गरिएको र १४ अगस्ट २०२५ मा आधिकारिक विज्ञप्तिमार्फत जानकारी सार्वजनिक गरिएको मन्त्रालयको भनाइ छ।  

साथै विभिन्न अवसरहरूमा सेनाका उच्च अधिकारीहरूले शहिदका परिवारलाई सम्मान प्रदान गरिसकेको पनि उल्लेख गरिएको छ।

राष्ट्रिय समर स्मारकमा नाम अंकित गर्ने प्रक्रिया पनि निश्चित प्रोटोकलअनुसार हुने भन्दै मन्त्रालयले यस विषयमा फैलाइएका केही दाबीहरू भ्रामक भएको जनाएको छ।

अपरेसनमा शहादत प्राप्त गरेका सैनिकहरूमा सूबेदार मेजर पवनकुमार, राइफलम्यान सुनील कुमार, लान्स नायक दिनेशकुमार, अग्निवीर मुद मुरली नाइक, हवलदार सुनीलकुमार सिंह र वायुसेनाका सार्जेन्ट सुरेन्द्र कुमार रहेका छन्।  

यसबाहेक बीएसएफका थप दुई सुरक्षाकर्मीले पनि अपरेसनका क्रममा ज्यान गुमाएको मन्त्रालयले जनाएको छ।

मन्त्रालयले शहिद सैनिकहरूको योगदानलाई लिएर अनावश्यक विवाद सिर्जना गर्नु गलत भएको बताउँदै यसले शोकमा रहेका परिवारलाई थप पीडा दिन सक्ने चेतावनी दिएको छ।  

सबै शहिद सैनिकहरू राष्ट्रका गौरव भएको उल्लेख गर्दै उनीहरूको स्मृतिलाई उच्च सम्मानका साथ सधैं सम्झिने प्रतिबद्धता पनि व्यक्त गरिएको छ।