विद्युत प्राधिकरणको पुनर्संरचनाका लागि कार्यदल गठन

काठमाण्डौ । सरकारले नेपाल विद्युत प्राधिकरणको पुनर्संरचना (अनबन्डलिङ) प्रक्रिया अघि बढाउन कार्यदल गठन गरेको छ । आगामी आर्थिक वर्ष २०८३/८४ को बजेटमा गरिएको घोषणाअनुसार प्राधिकरणको पुनर्संरचनासम्बन्धी मार्गचित्र तयार गर्न ऊर्जा, जलस्रोत तथा सिँचाइ मन्त्रालयले सहसचिव सन्दिप देवको संयोजकत्वमा कार्यदल गठन गरेको हो ।

कार्यदलमा मन्त्रालय, नेपाल विद्युत प्राधिकरण, जल तथा ऊर्जा आयोगको सचिवालय तथा अन्य सम्बन्धित निकायका प्रतिनिधिहरू सदस्य रहेका छन् । कार्यदलले पुनर्संरचनाको उपयुक्त मोडालिटी, आवश्यक कानुनी तथा नीतिगत व्यवस्था, संरचनागत सुधार र कार्यान्वयन प्रक्रियाबारे अध्ययन गरी सरकारलाई सुझाव दिनेछ । 

कार्यदलको विस्तृत कार्यादेश (टिओआर) भने अझै तय हुन बाँकी छ । कार्यादेश स्वीकृत भएपछि कार्यदलले अध्ययन तथा परामर्श प्रक्रिया अघि बढाउनेछ । सरकारले बजेटमार्फत नेपाल विद्युत प्राधिकरणलाई उत्पादन, प्रसारण, वितरण तथा विद्युत व्यापारका लागि छुट्टाछुट्टै कम्पनीमार्फत सञ्चालन गर्ने योजना सार्वजनिक गरिसकेको छ ।

कार्यदलको सिफारिसका आधारमा पुनर्संरचनासम्बन्धी आवश्यक प्रक्रिया अघि बढाइने सरकारको तयारी छ ।