जनार्दन शर्मा, सीके राउत र उपेन्द्र यादवसहितका नेता ललितपुरमा छलफलमा

काठमाण्डौ । प्रगतिशील लोकतान्त्रिक पार्टीका संरक्षक जनार्दन शर्मा, जनमत पार्टीका अध्यक्ष डा. सीके राउत र जनता समाजवादी पार्टी (जसपा) नेपालका अध्यक्ष उपेन्द्र यादवसहित विभिन्न दलका नेताहरू छलफलमा जुटेका छन्।

सोमबार अपराह्न ललितपुरमा जारी छलफलमा आम जनता पार्टीका अध्यक्ष प्रभु साह र जसपा नेपालका नेता जितेन्द्र सोनललगायत नेताहरूको पनि सहभागिता छ।

नेताहरूबीच भइरहेको छलफलको विषय र उद्देश्य भने औपचारिक रूपमा सार्वजनिक गरिएको छैन। समसामयिक राजनीतिक परिस्थिति तथा आगामी सहकार्यका सम्भावनाबारे छलफल भइरहेको अनुमान गरिए पनि सहभागी नेताहरूले यसबारे खुलाएका छैनन्।

प्रगतिशील लोकतान्त्रिक पार्टीका संरक्षक शर्माले छलफल जारी रहेकाले तत्काल कुनै निष्कर्ष सार्वजनिक गर्न नमिल्ने बताए।

“हामी अहिले छलफलकै चरणमा छौँ। केही निचोड आएपछि जानकारी गराउँछौँ,” शर्माले संक्षिप्त प्रतिक्रिया दिँदै भने।

जसपा नेपालका अध्यक्ष यादवले पनि नेताहरू छलफलमा रहेको पुष्टि गरेका छन्। छलफलबाट हालसम्म कुनै ठोस निष्कर्ष ननिस्किएको र निचोडमा पुगेपछि जानकारी गराइने उनको भनाइ छ।

फरक–फरक राजनीतिक दलका शीर्ष नेताहरू एकै ठाउँमा भेला भएर छलफलमा जुटेपछि सम्भावित राजनीतिक सहकार्य वा नयाँ समीकरणका विषयमा चासो बढेको छ।