विश्वासको मत नपाउने भएपछि सुदूरका मुख्यमन्त्री शाहले दिए राजीनामा

काठमाण्डौ ।  सुदूरपश्चिम प्रदेशका मुख्यमन्त्री कमलबहादुर शाहले पदबाट राजीनामा दिएका छन्। प्रदेशसभाबाट विश्वासको मत प्राप्त गर्ने अवस्था नदेखिएपछि उनले बिहीबार साँझ राजीनामा घोषणा गरेका हुन्।

प्रदेशसभा बैठकलाई सम्बोधन गर्दै शाहले पद छाड्ने घोषणा गरेका थिए। त्यसपछि उनले प्रदेश प्रमुखसमक्ष औपचारिक रूपमा राजीनामा बुझाएका छन्।

गत असार ३१ गते नेकपा एमालेले सरकारलाई दिएको समर्थन फिर्ता लिएपछि शाह नेतृत्वको सरकार अल्पमतमा परेको थियो। संविधानअनुसार ३० दिनभित्र विश्वासको मत लिनुपर्ने समयसीमा बिहीबार पूरा हुँदै थियो।

प्रदेशसभालाई सम्बोधन गर्दै शाहले आफ्नो कार्यकालमा प्राप्त जिम्मेवारीअनुसार काम गरेको बताए। आवश्यक अधिकार र सहयोगको अभावमा काम गर्न कठिन भएको उनको भनाइ थियो।

शाहको राजीनामासँगै सुदूरपश्चिममा नयाँ सरकार गठनको प्रक्रिया अघि बढ्ने भएको छ। नयाँ सरकार गठनका लागि नेकपा र नेकपा एमालेबीच सहमति भइसकेको बताइएको छ।

सहमति अनुसार अब नेकपाको नेतृत्वमा नयाँ सरकार गठन गर्ने तयारी गरिएको छ।