बाढी प्रभावितका लागि भारतको पाँचौँ राहत विमान नेपाल आउँदै

NEWS
बुधबार, भाद्र १७,२०८३ 09:09:40

काठमाण्डौ । नेपालमा आएको विनाशकारी बाढी तथा पहिरोबाट प्रभावित नागरिकका लागि भारतले राहत तथा उद्धार सामग्री पठाउने क्रमलाई निरन्तरता दिएको छ। यसैक्रममा भारतको पाँचौँ विमान आवश्यक राहत सामग्रीसहित नेपालका लागि प्रस्थान भएको छ।

भारतका विदेशमन्त्री डा. एस. जयशंकरले सामाजिक सञ्जाल ‘एक्स’मार्फत पाँचौँ राहत विमान नेपालतर्फ पठाइएको जानकारी दिएका हुन्।

उनका अनुसार विमानमा विशेष उपकरणसहित ११ सदस्यीय उद्धार टोली र ५.५ टन अत्यावश्यक औषधि पठाइएको छ। यसअघि पनि भारतले बाढी प्रभावित नेपालका लागि राहत तथा उद्धार सामग्रीसहितका विमान पठाउँदै आएको थियो।

नेपालमा आएको विनाशकारी बाढीपछि ठूलो मानवीय क्षति भएको छ। बाढी तथा पहिरोमा परी एक हजारभन्दा बढीको मृत्यु भएको र ४ हजारभन्दा बढी व्यक्ति बेपत्ता रहेको विवरण सार्वजनिक भएको छ। नेपाल प्रहरीले मृतकको संख्या अझै बढ्न सक्ने जनाएको छ।

यसैबीच, बाढीबाट प्रभावित विभिन्न जिल्लामा बेपत्ता तथा मृतकको खोजी र उद्धार कार्य जारी छ। चितवन जिल्लामा सबैभन्दा धेरै शव फेला परेको जनाइएको छ। शवको संख्या र पहिचानमा देखिएको कठिनाइका कारण केही शवलाई सामूहिक रूपमा अन्त्येष्टि गर्ने काम भइरहेको बताइएको छ।

विपद्का कारण प्रभावित क्षेत्रमा उद्धार, राहत वितरण तथा पुनःस्थापनाका लागि नेपाल सरकार, सुरक्षा निकाय, स्थानीय तह र विभिन्न संघसंस्थाले काम गरिरहेका छन्। भारतसहित छिमेकी तथा अन्तर्राष्ट्रिय समुदायबाट समेत नेपाललाई राहत सहयोग प्राप्त भइरहेको छ।