विद्युतीय भुक्तानीका माध्यमबाट भुक्तानी नहुँदा पनि ब्यालेन्स घटेको छ ? यति दिनभित्र हुन्छ हिसाब मिलान

BANKING
मंगलवार, जेष्ठ ८,२०८१ 07:36:38

काठमाण्डौ । विद्युतीय भुक्तानीका माध्यमबाट कारोबार गर्दा कहिलेकाही भुक्तानीसम्बन्धी समस्याहरु झेल्नुपर्ने हुनसक्छ । डिजिटल वालेट,मोबाइल बैंकिङ,इन्टरनेट बैंकिङ,एसएमएस लगायतका विद्युतीय भुक्तानीका माध्यमबाट भुक्तानी गर्दा वा रकमान्तर गर्दा कारोबार सफल नहँदा पनि कहिलेकाही प्राविधिक कारणवश खाताबाट मौज्दात घट्न सक्छ । यस्तो अवस्थामा रकम फिर्ता गर्नका लागि ग्राहकले खबर गरेमा वा नगरेमा राष्ट्र बैंकले हिसाब मिलाउनुपर्ने व्यवस्था गरेको छ ।

राष्ट्र बैंकले गरेको व्यवस्था अनुसार विद्युतीय भुक्तानीका माध्यमबाट जारी गर्ने संस्था र भुक्तानी जानुपर्ने संस्था एउटै भएमा कारोबार भएपछिको एक दिन(टी प्लस वान)भित्र हिसाब मिलाउनुपर्छ ।

त्यस्तै विद्युतीय भुक्तानीका माध्यमबाट जारी गर्ने संस्था र भुक्तानी जानुपर्ने संस्था फरक फरक भई दुवै नेपाली संस्था भएमा कारोबार भएपछिको ३ दिनभित्र हिसाब मिलाउनु पर्छ । तर विद्युतीय भुक्तानीका माध्यमबाट जारी गर्ने संस्था र भुक्तानी जानुपर्ने संस्था फरक फरक भई कुनै एक विदेशी संस्था भएमा कारोबार भए पछिको ३० दिनभित्र हिसाब मिलाउनुपर्ने व्यवस्था रहेको छ ।

उपयुक्त समयसीमाभित्र हिसाब मिलाउने दायित्व उपकरण जारी गर्ने र प्रयोग हुने दुवै संस्थाको हुने राष्ट्र बैंकले जनाएको छ ।