नेप्से पुगेर अर्थमन्त्रीले सोधे, ‘३ हजार माथि पुगेको बजार कसरी २५८० मा आईपुग्यो ?’

काठमाण्डौ । अर्थमन्त्री विष्णुप्रसाद पौडेलले ३ हजार विन्दुसम्म पुगिसकेको नेप्से २५८० विन्दुमा कसरी झर्यो भनेर प्रश्न गरेका छन् । आज बजारको फ्रन्टलाइन रेगुलेटर नेप्सेको आकस्मिक भ्रमण गर्न पुगेका पौडेलले नेप्सेका अधिकारीहरुलाई ३ हजार माथि पुगेको बजार २५८० मा कसरी पुग्यो ? भनेर प्रश्न गरेका हुन् ।  

उनले नेप्सेका अधिकारीहरुलाई केही गलत तत्वले फैलाएको अफवाहको पछि लगानीकर्ता दौड्दा बजारमा कुनै कारण बिना नै गिरावट देखिएको बताए ।  

अर्थमन्त्रीले फेसबुक, क्लबहाउस लगायतका सामाजिक सञ्जालमा गैरकानूनी ढंगले बजारलाई नकारात्मक प्रभाव पार्न र लगानीकर्ताको मनोबल गिराउन सक्रिय पात्र तथा समूहहरुलाई कडा कारवाही गर्ने चेतावनि समेत दिए । पौडेलले लगानीकर्तालाई कसैले उक्साएको भरमा भन्दा आफैले कम्पनीको वित्तीय अवस्था अध्ययन गरी सेयर खरिद बिक्रीको निर्णय लिने बानीको विकास गर्न समेत आह्वान गरेका छन् । 

‘नेप्सेले पनि सामाजिक सञ्जालमा हुने यस्ता गतिविधिप्रति चासो बढाउनु पर्छ, ’ पौडललले भने,‘देशको अर्थतन्त्र र प्रमुख सूचकहरु सबै सकारात्मक हुँदाहुँदै बजार यसरी घटाइनु प्राकृतिक छैन । यसमा सरकारले छानबिन गर्नेछ ।

सो क्रममा पौडेलले नेप्सेको पुनर्संचरना हुने र आईपीओ समेत जारी हुने संकेत गरेका थिए । करिब ३० मिेनट नेप्सेका कर्मचारीहरुलाई सम्बोधन गरेको अर्थमन्त्री सेयर कारोबारको लाइभ हेर्न भन्दै नेप्से छिरेका थिए । पौने ३ बजे त्यहाँ पुगेको उनलाई करिब १५ मिनेट सेयर कारोबारको लाभई देखाइएको थियो । कुनै पूर्व निर्धारित कार्यक्रम बिना अर्थमन्त्री नेप्से पुग्नुलाई कर्मचारीहरुले लगानीकर्ताको घट्दो मनोबल उकास्ने रणनीतिको रुपमा ब्याख्या गरेका छन् ।  

नेप्सेका एक कर्मचारीले बिजशालासँग भने, ‘अति नै व्यवस्त हुने अर्थमन्त्री फुर्सदिलो जस्तो भई नेप्सेमा आकस्मिक आउनुलाई बिना कारण घटिरहेको बजारमा मनोबल उकास्ने रणनीतिको रुपमा बुझेका छौं । लगानीकर्ताहरुबाट आएको दबाबलाई सम्बोधन गर्दै अर्थमन्त्रीको सरप्राइज भिजिट भएको देखिन्छ ।’