मार्जिन कल आउँदा धितो नथपे बैंकले नै ऋणिको सेयर बिक्री गर्न पाउने

काठमाण्डौ । सेयर बजारको मूल्यमा हुने परिवर्तनको कारणले सेयर धितो सुरक्षणको मूल्यमा कमी आएर मार्जिन कल भएको समयमा ऋणिले थप सुरक्षण नराखे बैंक तथा वित्तीय संस्थाले आफैं सेयर बिक्री गरेर ऋण असूल्न पाउने भएका छन् ।  

यस्तै, केन्द्रीय बैंकले सेयरमा प्राप्त हुने यकिन भएको हकप्रद र बोनस शेयरहरु सूचीकरण नभएको अवस्थामा समेत धितोको रुपमा गणना गर्न पाइने व्यवस्था गरिदिएको छ ।  

नेपाल राष्टबैंकले बैंक तथा वित्तीय संस्थाहरुका लागि एकीकृत निर्देशन २०८० मा संसोधन गर्दै यस्तो व्यवस्था गरेको हो । 

'सेयरको बजार मूल्यमा हुने परिवर्तनको कारणले शेयर धितो सुरक्षणको मूल्यमा कमी आएमा सम्बन्धित बैंक तथा वित्तीय संस्थाले सोको मूल्य अनुगमन गरी थप धितोको लागि ऋणी ग्राहकलाई सूचित गर्नुपर्नेछ ।' संसोधित निर्देशनमा भनिएको छ-'इजाजतपत्रप्राप्त संस्थाले मार्जिन कल गर्ने तथा थप सुरक्षण नराखेमा सेयर बिक्री गरी असुलउपर गर्नेसम्बन्धी व्यवस्था स्पष्ट रुपमा सम्बन्धित प्रोडक्ट पेपरमा उल्लेख गर्नुपर्नेछ । मार्जिन कल गर्दा उक्त सेयरमा प्राप्त हुने यकिन भएको हकप्रद र बोनस शेयरहरु सूचीकरण नभएको अवस्थामा समेत धितोमा राखिएको सेयर संख्यामा गणना गर्न सकिनेछ ।'  

यसअघि इजाजतपत्रप्राप्त संस्थाले मार्जिन कल गर्ने तथा थप सुरक्षण नराखेमा सेयर बिक्री गरी असुलउपर गर्नेसम्बन्धी व्यवस्था स्पष्ट रुपमा सम्बन्धित प्रोडक्ट पेपरमा उल्लेख गर्नुपर्ने व्यवस्था थिएन ।