सुनचाँदी धितो राखेर ५० लाखभन्दा बढी ऋण नपाइने, धेरै लिएकालाई २ वर्षको समय

काठमाण्डौ । तपाईसँग करोडौंको सुनचाँदी भए पनि आपतकालीन अवस्थामा बैंक तथा वित्तीय संस्थाबाट लोन लिनु परे ५० लाख रुपैयाँभन्दा बढी पाउनुहुने छैन ।  

राष्टबैंकले “क”, “ख”, “ग” वर्गका बैंक तथा वित्तीय संस्थाहरुलाई जारी गरिएको एकीकृत निर्देशन, २०८० मा संशोधन÷परिमार्जन÷थप गर्दै मंगलबारदेखि यस्तो व्यवस्था गरेको हो । 

कुनै व्यक्तिलाई सुनचाँदी धितो कर्जा प्रवाह गर्दा त्यस्तो ऋणीले धितोस्वरुप दिएको सुन वा चाँदी जाँच गरी कर्जा सुरक्षित रहेको यकिन गरेर मात्र कर्जा प्रवाह गर्नु पर्नेछ । यसरी कर्जा प्रवाह गर्दा ऋणीले धितोस्वरुप दिएको सुन वा चाँदी एउटै थैलीमा राखिएको हुनुपर्नेछ । कथम्कदाचित कुनै ऋणीले दिएको एकभन्दा बढी थैलीहरु वा एकभन्दा बढी थैलीहरु राखिएको एउटा थैलीमात्र धितो राखी वा सुनचाँदीको परीक्षण जाँच नगरी सुनचाँदी धितो कर्जा प्रवाह भएमा त्यस्तो कर्जामा शतप्रतिशत कर्जा नोक्सानी व्यवस्था गर्नुपर्नेछ । 

यस प्रकारको सुनचाँदी धितो कर्जाको एकल ग्राहक कर्जा सीमा रु. ५० लाख कायम गरिएको सर्कुलरमा उल्लेख छ।

केन्द्रीय बैंकले यसअघि प्रवाह भएको कर्जाको हकमा २०८३ असार मसान्तसम्म एकल ग्राहक कर्जा सीमा कायम गरिसक्न समेत निर्देशन दिएको छ ।