चिसोबाट बच्न प्रयोग गर्ने हिटरले निम्त्याउन सक्छन यस्ता समस्या, सही तरिकाले कसरी प्रयोग गर्ने ?

काठमाण्डौ । देशभर चिसोयामको सुरुवात भईसकेको छ । चिसो बढेसँगै रुम हिटर जस्ता न्यानो बनाउने साधन अनिवार्य जस्तै बन्ने गर्छ । चिसोपनबाट छुटकारा दिलाउन रुम हिटर सजिलो र छिटो माध्यम बन्ने गर्छ ।  

तर हिटरको बढ्दो प्रयोगले यसले दीर्घकालमा निम्ताउने सम्भावित स्वास्थ्य तथा पर्यावरणीय जोखिम पनि बढाई दिएको छ । कृत्रिम तापमा लामो समयसम्म बसिरहदा यसले छाला सुख्खा बनाउने, स्वासप्रस्वाससँग सम्बन्धित समस्या,उच्च उर्जा खपत र पर्यावरणीय जोखिम समेत निम्त्याउन सक्छ ।  

बजारमा विभिन्न प्रकारका हिटरहरु उपलब्ध छन् । यी हिटरहरुको आ–आफ्नै फाइदा र बेफाइदाहरु हुन्छन् । आम रुपमा बजारमा पाइने भनेको ह्यालोजेन हिटर,फिलामेन्ट हिटर,ब्लोअर हिटर र आयल फिल्ड रेडियटर्स हुन् । यी सबैको आफ्नै विशेषता र जोखिम छन् । जसलाई प्रयोगकर्ताले राम्ररी पहिल्याउनु पर्ने हुन्छ ।  

कृत्रिम तापमा लामो समयसम्म बस्दा यसले छालालाई सुख्खा बनाउने गर्छ । जसका कारण छाला चिलाउने,रातोपना र समय अगावै बुढो देखिने जस्ता समस्या देखिन सक्छ । रुम हिटरको तापले छालाको प्राकृतिक आद्र्रता सोस्ने गर्छ । जसका कारण छाला टाइट भई असजिलो हुने गर्छ । चिसोयाममा सुख्खा मौसमका कारण पहिले देखिनै समस्याग्रस्त रहेको छालामा यसले थप समस्या निम्त्याउृन सक्छ ।  

छालालाई स्वस्थ राख्न आद्र्रताले महत्वपूर्ण भूमिका खेल्ने गर्छ । छाला धेरै सुख्खा भयो भने यसले एक्जेमा र सोराईसिस जस्ता समस्या निम्त्याउन सक्छ । धेरैजसो रुम हिटरले कोठाभित्रको आद्र्रता घटाउने गर्छन् ।  

हिटरको तापले दम र एलर्जी जस्ता समस्या भएकालाई थप समस्या समेत पार्न सक्छ । स्वाससँग सम्बन्धित बिरामीलाई लामो समय हिटरमा बस्दा स्वास फेर्न कठिनाई हुने समस्या समेत देखिन सक्छ ।  

यसका साथै यसले निद्रामा समेत असर पार्न सक्छ ।  

चिसोयाममा छालाको ख्याल कसरी गर्ने ?

–कोठामा उचित मात्रामा आद्र्रता कायम राख्न ‘ह्युमीडीफायर’को प्रयोग गर्ने

–तापमा धेरै बसे बसेपछि प्रत्येकपटक म्वास्चराइजरको प्रयोग गर्ने,

–चिलाउने र पोल्ने समस्याबाट बच्न वास्ना नआउने म्वास्चराइजरको प्रयोग गर्ने  

स्वासप्रस्वासको समस्याबाट कसरी बच्ने ?

–धुलोबाट बच्न हिटरलाई हिटरलाई सफा राख्ने

–कोठाभित्र ताजा हावाका लागि कोठालाई नियमति रुपमा भेन्टिलेट गर्ने

–यदि स्वाससँग सम्बन्धी समस्या देखिए चिकित्सकसँग परामर्श लिने

अग्नि सुरक्षा कसरी गर्ने ?

–हिटर बालेर कहिल्यै पनि नछाड्ने(विशेष गरेर फिलामेन्ट हिटर)

–कागज र पर्दा जस्ता चाडो आगो टिप्ने वस्तुहरुबाट हिटरलाई टाढा राख्ने

–सम्भावित कमी कमजोरी वा क्षतिका लागि हिटरलाई बेलाबेला मर्मत सम्भार गर्ने