अमेरिकी सेयर बजार डाउ जोन्समा ५० वर्षपछि पहिलोपटक लगातार १० दिन गिरावट

काठमाण्डौ । ब्लूचिप कम्पनीहरुको कारोबार हुने अमेरिकी सेयर बजार मापक इन्डेक्स,‘डाउ जोन्स’ लगातार १० दिन घटेको छ ।  

अमेरिकी केन्द्रीय बैंकले बुधबार ब्याजदरमा गरेको कटौती र सन् २०२५ मा दुईपटक मात्रै कटौती हुनेसक्ने जनाएसँगै बुधबार अर्थात १० औं दिन पनि डाउ जोन्समा गिरावट आएको हो । यसअघि भने सन् २०२५ मा ४ पटकसम्म ब्याजदरमा कटौती हुनसक्ने प्रक्षेपण गरिएको थियो ।  

बुधबार डाउ जोन्स इन्डेक्स २.६ प्रतिशत अर्थात १ हजार १२३ अंकले घटेको छ । डाउ जोन्सको यो १० दिनको लगातारको गिरावट सन् १९७४ अक्टोबर २० पछिकै पहिलो हो । सन् १९७४ मा डाउ जोन्स लगातार ११ दिन घटेको थियो ।  

यो दिनको गिरावटमा डाउ इनडेक्स करिब ६ प्रतिशतले घटिसकेको छ । बुधबार गिरावट आउनु अघि अन्य अमेरिकी इनडेक्सहरु भने रेकर्ड विन्दु नजिक पुगेका थिए । बुधबार एस एण्ड पी५०० पनि ३ प्रतिशत र नास्डक कम्पोजिट ३.६ प्रतिशतले ओरालो लागेका छन् ।  

लगानीकर्ताले अपेक्षा गरेअनुरुप नै फेडरल रिजर्भले २५ बेसिक प्वइन्टले ब्याजदर कटौती गरेको छ । तर सन् २०२५ मा दुईपटक मात्रै ब्याजदर कटौती हुने संकेतले गदा लगानीकर्ताको सेन्टिमेन्ट कमजोर बन्दा अमेरिकी सेयर बजारमा गिरावट आएको जनाइएको छ ।