ईभी बजार प्रतिष्पर्धात्मक बनेसँगै टेस्लाले साइबरट्रकमा छुट दिने

काठमाण्डौ । ईभी कार निर्माता कम्पनी टेस्लाले आफ्नो नयाँ साइबरट्रकमा छुट दिने भएको छ । कम्पनीले साइबरट्रकका नयाँ सवारी साधनमा १६ सय डलरसम्मको छुट प्रदान गर्ने भएको हो । यस्तै कम्पनीले डेमो भर्जनको ट्रकमा २ हजार ६ सयसम्मको छुट दिने भएको छ । गत केही सातादेखि टेक्ससमा रहेको टेस्लाको कारखानामा अनपेन्टेड स्टिल पिकअपको बिक्रीमा कमी आएको जनाइएको छ ।  

अनकन्भेन्सनल पिकअप सन् २०२३ बाट ग्राहकहरु माझ पुग्न लागेको हो । टेस्लाका सीईओ एलन मस्कले सन् २०१९ मा पहिलोपटक साइबरट्रक अनावरण गरेका थिए । उनले त्यसबेला यसको मूल्य करिब ४० हजार डलर हुने बताएका थिए । तर सन् २०२४ मा यसको न्यूनतम मूल्य करिब ८० हजार डलर रहेको छ ।

वालस्ट्रिटले पनि साइबरट्रकलाई टेस्लाको कोर अटोमोटिक बिक्रीको कडीको रुपमा लिएको थियो ।  

कक्स अटोमोटिभका अनुसार गत वर्ष साइबरट्रकले फोर्डको लाइटनिङ एफ–१५० लाई पछि पार्दै घरेलु बजारमा बिक्री हुने पाचौं उत्कृष्ठ ईभी बनेको थियो । यद्यपी उच्च मूल्य र उत्पादनमा त्रुटिका कारण बारम्बर बजारबाट फिर्ता मगाउने समस्याले यसको वृद्धि प्रभावित बनेको छ । ड्राइभ इन्भटर्समा समस्या आएपछि गत नोभेम्बर महिनामा कम्पनीले छैठौपटक साइबरट्रकलाई बजारबाट फिर्ता मगाएको थियो ।

कक्स डेटाका अनुसार सन् २०२४ मा अमेरिकामा ईभीको बिक्री १.३ मिलियन युनिट पुगेको थियो । जुन अघिल्लो वर्षको तुलनामा ७.३ प्रतिशतले धेरै हो । तर यो अवधिमा टेस्लाको बिक्री ३७ हजार युनिटले घटेको छ ।  

यो वर्ष टेस्लाका मोडल वाई एसयुभी र मोडल थ्रि सेडान सबैभन्दा बढी बिक्री हुने शीर्ष २ ब्राण्ड बनेका छन् । कक्सका अनुसार गत वर्ष टेस्लाले अमेरिकामा ३८ हजार ९६५ युनिट साइबरट्रक बिक्री गरेको छ ।  

केही समयअघि मात्रै एलन मस्कले क्यालिफोर्नियामा आपूर्तिमा ढिलाई भएको भन्दै ग्राहकहरु सामु माफि मागेका थिए ।