आशा लघुवित्तको २०.१४ लाख कित्ता सेयरको लक इन अवधि फागुनमा समाप्त हुने

काठमाण्डौ ।  आशा लघुवित्त वित्तीय संस्था लिमिटेडको लक–इन अवधि फागुन ११ गते समाप्त हुने भएको छ।  संस्थाको संस्थापक सेयरधनीहरु तथा कर्मचारीको लक इनमा राखिएको सेयरको लक–इन अवधि समाप्त हुन लागेको हो ।  

संस्थाको संस्थापक सेयरधनीको स्वामित्वमा रहेको १९ लाख ९९ हजार ३७५ कित्ता र कर्मचारीको स्वामित्वमा रहेको १४ हजार ८५२ कित्ता गरी कुल २० लाख १४ हजार २२७.५० कित्ता सेयरको लक–इन अवधि समाप्त हुन लागेको संस्थाले जनाएको छ ।  

लक इनमा रहेको संस्थापक सेयरमध्ये प्रारम्भिक लकइनमा १७ लाख ५० हजार कित्ता र २ लाख ४९ हजार ३७५ कित्ता बोनस सेयर लक इन कित्ता रहेको छ । यस्तै कर्मचारीको कुल कित्तामा १३ हजार कित्ता प्रारम्भिक र १ हजार ८५२.५० कित्ता बोनस सेयर लकइन कित्ता रहेको छ ।  

कम्पनीले २०७८ फागुन ४ गतेदेखि ८ गतेसम्म सर्वसाधारण(कर्मचारी समेत) लाई आईपीआो निष्कासन गरेको थियो । सर्वसाधारणमा उक्त आईपीओ २०७८ फागुन १२ गते बाँडफाँड गरिएको थियो ।  

लक–इन पिरियड समाप्त भएपछि यी सेयर दोस्रो बजारमा कारोबारमा आउनेछन् । तर संस्थाको संस्थापक सेयर सदस्यमध्ये सञ्चालक सदस्यमा रहेका व्यक्ति तथा संस्थाको उच्च तहमा रहेका कर्मचारीले भने सेयर खरिदबिक्री गर्न नपाउने कम्पनीले स्पष्ट पारेको छ ।