लघुबीमा कम्पनीहरुको व्यवसाय १२३१.१८% ले बढ्यो, कुनको कति ?

काठमाण्डौ । लघुबीमा कम्पनीहरुले झण्डै एक अर्ब प्रिमियम संकलन गरेका छन् । सञ्चालनमा रहेका ७ वटा लघुबीमा कम्पनीहरुले चालु आवको दोस्रो त्रैमाससम्म ९३ करोड ५९ लाख रुपैयाँ बीमाशुल्क आर्जन गरेका छन् ।  

यो रकम गत आवको तुलनामा १२३१.१८ प्रतिशत बढी हो । गत आवको सोही अवधिसम्म लघुबीमा कम्पनीहरुले ७ करोड ३ लाख रुपैयाँ मात्रै प्रिमियम संकलन गरेका थिए ।  

लघुबीमा कम्पनीहरु गत आवमा मात्रै सञ्चालनमा आएका हुन् । एक वर्षसम्म आइपुग्दा लघुबीमा कम्पनीहरुले व्यवसाय उल्लेख्य बढाउन सफल भएका छन् ।  

दोस्रो त्रैमाससम्म सबैभन्दा धेरै प्रिमियम भित्र्याउनेमा गार्डियन माइक्रो लाइफ रहेको छ । कम्पनीले २० करोड २० लाख रुपैयाँ प्रिमियम संकलन गरेको छ । गत आवको सोही अवधिसम्म भने कम्पनीले जम्मा ६६ लाख रुपैयाँ मात्रै प्रिमियम संकलन गरेको थियो ।  

त्यस्तै, क्रेष्ट माइक्रो लाइफले १८ करोड ६४ लाख रुपैयाँ प्रिमियम संकलन गरेको छ । कम्पनीको यो व्यवसाय गत आवको तुलनामा १०८१.२२ प्रतिशत बढी हो । गत आवको सोही अवधिसम्म क्रेष्ट माइक्रो लाइफले जम्मा १ करोड ५७ लाख रुपैयाँ मात्रै बीमाशुल्क संकलन गरेको थियो ।  

यसका साथै लिबर्टी माइक्रो लाइफले १२ करोड ४४ लाख रुपैयाँ प्रिमियम संकलन गरेको छ । यो रकम गत आवको तुलनामा ४३०५ प्रतिशत बढी हो । गत आवको सोही अवधिसम्म लिबर्टीले जम्मा २८ लाख रुपैयाँ मात्रै प्रिमियम भित्र्याएको थियो ।  

यता निर्जीवन लघुबीमकतर्फ भने सर्वाधिक नेपाल माइक्रो इन्स्योरेन्सले १२ करोड ४१ लाख रुपैयाँ प्रिमिमय भित्र्याएको छ ।  

त्यस्तै, प्रोटेक्टिभ माइक्रो इन्स्योरेन्सले १० करोड ३७ लाख, स्टार माइक्रो इन्स्योरेन्सले ९ करोड ८२ लाख र ट्रस्ट माइक्रो इन्स्योरेन्सले ९ करोड ६८ लाख रुपैयाँ प्रिमियम भित्र्याएको छ ।