आकाशिदै सुनको भाउ, एकैदिन प्रतिऔंस ३० डलरले बढ्यो

Gold
बुधबार, फाल्गुन ७,२०८१ 09:59:33

काठमाण्डौ । अन्तराष्ट्रिष्य बजारमा सुनको मूल्य १ प्रतिशतले बढेको छ । आजको कारोबारमा सुनको मूल्य १.०६ प्रतिशत अर्थात प्रतिऔंस ३०.६८ डलरले बढेको छ ।

यो वृद्धिसँगै सुनको मूल्य प्रतिऔंस २ हजार ९२९ डलर कायम भएको छ । अमेरिकी राष्ट्रपति डोनाल्ड ट्रम्पले घोषणा गरेको ट्यारिफका कारण आर्थिक वृद्धिमा सुस्तता छाउने सम्भावनाका कारण सुनको मूल्य उकालो लागेको हो । आर्थिक अनिश्चितता र विश्व भू–राजनीतिक संकटका बेला सुनलाई सुरक्षित लगानीको रुपमा लिइने गरिन्छ ।

सुनको मूल्य गत साता हालसम्मकै उच्च कायम भएको थियो । त्यबेला सुनको मूल्य प्रतिऔंस २ हजार ९४२ डलर पुगेको थियो । ट्रम्पको व्यापार नीतिका कारण सुनको मागमा वृद्धि देखिएको र सुनमा बुलिस चार्ट पोस्चर बनेको विज्ञहरुले बताएका छन् । विज्ञहरुले विश्वका केन्द्रीय बैंकहरुले समेत सुनको खरिद बढाउन सक्ने आँकलन गरेका छन् ।

गत महिना कार्यभार सम्हालेदेखि अमेरिकी राष्ट्रपति ट्रम्पले ट्यारिफको श्रृखला जारी गर्दै विश्वलाई व्यापार युद्धतर्फ धकेलिरहेका छन् ।

आज चाँदीको मूल्य समेत ०.३१ डलरले बढेर प्रतिऔंस ३२.६४ डलर पुगेको छ ।