विद्युत प्राधिकरणबाट कुलमानलाई हटाएर प्रधानमन्त्रीको सालोलाई नियुक्ति

काठमाण्डौ । सरकारले नेपाल विद्युत प्राधिकरणको कार्यकारी निर्देशकबाट कुलमान घिसिङलाई हटाउने निर्णय गरेको छ ।  

योसँगै प्राधिकरणको कार्यकारी निर्देशकमा हितेन्द्रदेव शाक्यलाई नियुक्ति दिइएको छ । 

सोमबार साँझ बसेको मन्त्रिपरिषद् बैठकले घिसिङलाई प्राधिकरणको कार्यकारी निर्देशक पदबाट हटाउने निर्णय गर्दै शाक्यलाई नियुक्ति दिने निर्णय गरेको एक मन्त्रीले बिजशालालाई जानकारी दिए । यसअघि २०७७ माघ २७ गते हितेन्द्रदेव शाक्य नै प्राधिकरणको कार्यकारी निर्देशकमा नियुक्त भएका थिए । कुलमान घिसिङको पहिलो कार्यकाल सकिएपछि शाक्यलाई कायममुकायम कार्यकारी निर्देशकको जिम्मेवारी दिइएको थियो । तर, प्रमुख कार्यकारी निर्देशकको रुपमा नियुक्त शाक्यले केही महिना मात्र काम गर्न पाएका थिए । २०७८ साउन तेश्रो साता पुनः तत्कालीन सरकारले शाक्यलाई जल तथा ऊर्जा आयोगमा विशिष्ठ श्रेणीको पद(सचिव)सरहको पूर्णकालीन सदस्य पदमा पदस्थापन गर्ने निर्णय गर्दै प्राधिकरणमा भने दोश्रो पटक कुलमानलाई नै ल्याइएको थियो । 

प्राधिकरणको नयाँ कार्यकारी निर्देशक बनाइएका हितेन्द्रदेव शाक्य नाताले प्रधानमन्त्री केपी शर्मा ओलीको सालो पर्छन् ।