प्रहरीको गोली लागी घाइते एक राजावादी प्रदर्शनकारीको मृत्यु, केही गम्भीर

काठमाण्डौ । राजावादी प्रदर्शनकारीहरुको आन्दोलन भड्किएर हिंसात्मक रुप लिएपछि भएको झडपका क्रममा प्रहरीको गोली लागी घाइते भएकामध्ये एकजनाको मृत्यु भएको छ ।  

प्रहरीका अनुसार काठमाण्डौको तीनकुनेमा शुक्रबार भएको झडपका क्रममा गम्भीर घाइतेमध्ये एकजनाको मृत्यु भएको हो । मृतक कीर्तिपुर नगरपालिका ४ बस्ने २९ वर्षीय सविन महर्जनको मृत्यु भएको गृह मन्त्रालयले जनाएको छ । 

झडपमा परी हालसम्म २२ जना घाइते भएका छन् । घाइते अवस्थामा त्रिवि शिक्षण अस्पतालमा लगिएका प्रदर्शनकारीको त्यहाँ पुग्नुअघि नै मृत्यु भइसकेको उपचारमा संलग्न चिकित्सकहरुले जनाएका छन् । मृतकको पोस्टमार्टमका लागि फरेन्सिक विभागमा पठाइसकिएको छ ।

प्रहरीले अवस्था नियन्त्रणबाहिर गएको भन्दै टियरग्याँससँगै रबरका गोली र हवाई फयर पनि गरेको थियो ।  

केही घाइतेहरुको अवस्था गम्भीर रहेको र उनीहरुको उपचार भइरहेको जनाइएको छ ।