दुर्गा प्रसाईंलाई पक्राउ गर्ने सरकारको तयारी

काठमाण्डौ । राजावादी आन्दोलनको नेतृत्व गरिरहेका दुर्गा प्रसाईंलाई सरकारले पक्राउ गर्ने तयारी गरेको छ ।  

केहीबेरअघि गृहमन्त्रालयमा पत्रकार सम्मेलन गर्दै सहसचिव छवि रिजालले राजवादीहरुको नाममा हिंसात्मक प्रदर्शन भएकोले यसको नेतृत्व गर्ने दुर्गा प्रसाईंलाई तत्काल नियन्त्रणमा लिन सम्बद्ध निकायलाई निर्देशन दिइसकिएको जानकारी दिए । 

गृह मन्त्रालयले दुर्गा प्रसाईंले भड्काएकै कारण तीनकुनेको प्रदर्शन हिंसात्मक बनेको र सो क्रममा एकजनाको मृत्यु भएको दाबी गरेको छ । घटनामा प्रहरी र प्रदर्शनकारीतर्फ गरी ३० जनाभन्दा बढी घाइते भएका छन् ।  

प्रदर्शनकारीहरुले तीनकुनेका निजी घर, रेष्टुरा तथा व्यवसायिक मलहरुमा समेत तोडफोड र आगजनी गरेका थिए । 

यस्तै, तीनकुनेबाट लखेटिएका प्रदर्शनकारीले कोटेश्वरस्थित भाटभटेनी सुपरमार्केटमा लूटपाट र तोडफोड मच्चाएका थिए । एकदर्जन बढी सवारी साधनमा आगजनी पनि गरेका थिए ।