सबै देशमाथि यसै सातादेखि नयाँ ट्यारिफ लगाउने ट्रम्पको घोषणा, एशियाली सेयरबजारमा भारी गिरावट

काठमाण्डौ । अमेरिकी राष्ट्रपति डोनाल्ड ट्रम्पले यसै सातादेखि लागू हुने नयाँ कर सबै देशका लागि लागू हुने बताएका छन् । बुधबारदेखि ठूलो मात्रामा नयाँ आयात शुल्क सुरु गर्न लागिएको बेला ट्रम्पको यस्तो बयान सार्वजनिक भएको हो । जसलाई उनले ‘अमेरिकाको मुक्ति दिवस’ को नाम दिएका छन्। यी नयाँ महशुलहरू पहिले नै लागू भइसकेका शुल्कहरू बाहेक थप गरिनेछ। अमेरिकाले पहिले नै आल्मुनियम, स्टिल र सवारीसाधनमा कर लगाएको छ ।

यसका साथै चीनबाट आउने सबै उत्पादनमा पनि उच्च महसुल लगाइएको छ ।‘ट्यारिफको निर्णय सबै देशहरूका लागि सुरु गर्नेछौं।’ ट्रम्पले भने । ट्रम्पले आफ्नो सरकार अन्य देशहरूको तुलनामा बढी उदार र दयालु भएको समेत दाबी गरे ।  

गत साता ट्रम्पले केही मात्रामा ट्यारिफ घटाउन सक्ने संकेत गरेका थिए । ट्रम्प प्रशासनका आर्थिक सल्लाहकार केभिन ह्यासेटले यी शुल्कहरू मुख्यतया अमेरिकासँग सबैभन्दा बढी व्यापार घाटा भएका १० देखि १५ देशहरूमा लागू हुने बताएका थिए । तर उनले ती देशहरूको नाम भने खुलाएका छैनन् ।  

यी शुल्कहरूले अमेरिकालाई अनुचित व्यापार प्रतिस्पर्धाबाट जोगाउन र राम्रो व्यापार सम्झौताहरू हासिल गर्न मद्दत गर्ने ट्रम्पको विश्वास छ।  

ट्रम्पको यो घोषणापछि सोमबार एशियाको सेयर बजारमा गिरावट देखिएको छ । आज जापानको सेयर बजार निक्की२२५ ्रइन्डेक्स ४.०५ प्रतिशत अर्थात १ हजार ५०२ अंकले ओरालो लागेको छ । दक्षिण कोरियाको सेयर बजार पनि आज ३ प्रतिशतले घटेर २ हजार ४८१ विन्दुमा खुम्चिएको छ । चीनको सीएसआई ३०० इन्डेक्स पनि ०.७१ प्रतिशतले झरेको छ ।  

यस्तै हङकङको हाङसेङ इन्डेक्स पनि १.३१ प्रतिशतले घटेको छ । आज भारतको सेयरबजार सार्वजनिक बिदाका कारण बन्द छ ।