ट्यारिफ कार्यान्वयनको पूर्वसन्ध्यामा सुनको मूल्यमा उछाल, एकैदिन ४४ डलरले वृद्धि

काठमाण्डौ । अन्तर्राष्ट्रिय बजारमा सुनको मूल्य उच्च वृद्धि भएको छ । अमेरिकी राष्ट्रपति डोनाल्ड ट्रम्पले आफ्ना व्यापार साझेदार देशहरुमाथि ट्यारिफ लगाउनुअघि सुनको मूल्यमा उच्च वृद्धि देखिएको हो ।  

यो समाचार तयार पार्दासम्म अन्तर्राष्ट्रिय बजारमा सुनको मूल्य प्रतिऔंस १.४३ प्रतिशत अर्थात ४४.४१ डलरले बढेको छ । सुन यतिबेला प्रतिऔंस ३ हजार १४५.३९ डलरमा कारोबार भईरहेको छ । यो मूल्य हालसम्मकै उच्च हो ।  

अघिल्लो दिन सुनको मूल्यले प्रतिऔंस ३१ सय डलरको आँकडा पार गरेको थियो ।  

अमेरिकी राष्टपति ट्रम्पले अप्रिल २ रेसिप्रोकल ट्यारिफ घोषणा गर्ने अपेक्षा गरिएको छ । अटो कम्पनीहरुमाथि भने अप्रिल ३ गतेदेखि नयाँ ट्यारिफ लागू हुनेछ ।  

यस्तै ट्रम्पले रुसले युक्रेनसँगको युद्ध अन्त्य गर्न अनिच्छा देखाए रुसबाट तेल खरिद गर्ने देशहरुलाई पनि २५ देखि ५० प्रतिशतसम्म ट्यारिफ लगाउने चेतावनी दिएका छन् ।  

यो वर्ष सुनको मूल्यमा १८ प्रतिशतको बढोत्तरी आईसकेको छ । सुनलाई समर्थन गर्ने मौद्रिक नीति, केन्द्रीय बैंकहरुको उच्च खरिद र एक्सचेञ्ज ट्रेडेड फण्डमा बढ्दो मागका कारण सुनको मूल्य निरन्तर बढिरहेको छ । सन् २०२४ मा भने सुनको मूल्य २७ प्रतिशतले बढेको थियो ।  

आज चाँदीको मूल्य समेत बढेको छ । चाँदीको मूल्य ०.०७ डलरले बढ्दै प्रतिऔंस ३४.१९ डलरमा कारोबार भईरहेको छ ।