नयाँ स्टक एक्सचेञ्ज तत्कालै आउने छैन छाँटकाँट , कमोडिटिज बजार पनि अन्यौलमा

काठमाण्डौ। लामो समयदेखि चर्चामा रहेको नयाँ स्टक एक्सचेञ्ज तत्काल आउने सम्भवना टर्दै गएको छ । नयाँ स्टक एक्सचेञ्जको बिषय केही समय पहिले धितोपत्र बोर्डको सञ्चालक समितिले नै रोक्न भनेको थियो । बोर्डस्थित उच्च स्रोतले दिएको जानकारीअनुसार खासगरि नयाँ स्टक एक्सचेञ्जको बिषयमा अध्ययन समितिल तयार पारेको प्रतिवेदनमा चिन्तामणी सिवाकोटिले यसअघि बुझाएको प्रतिवेदनकै विषयहरुमा हालको स्टक एक्सचेञ्जको पूँजी संरचनाको वृद्धि र स्तरउन्नती गर्दै नयाँ स्टक एक्सचेञ्जको लाइसेन्स दिने बिषय समेटिएको छ । 

यसकारण पनि हालको स्टक एक्सचेञ्जको पुनर्संरचना नगरि नयाँ स्टक एक्सचेञ्जको प्रक्रिया अघि बढ्न सम्भव नै नरहेको स्रोतले दाबी गर्यो । अघिल्लो साता अदालतबाट प्रक्रिया अघि बढाउन बाटो खुलेता पनि अर्थमन्त्रालयका अधिकारीहरु र धितोपत्र बोर्डकै कर्मचारीहरु पनि नयाँ स्टक एक्सचेञ्जको विषयमा अनिच्छुक रहेका कारण पनि नयाँ स्टक एक्सचेञ्जको विषय अघि बढ्न नसकेको स्रोतको दाबी रहेको छ ।

यसै विषयलाई लिएर एक कर्मचारीले राजीनामा दिइ सके भने अन्य पनि यो प्रकृया अघि बढेमा जागिर नै छोड्ने तरखरमा रहेका छन् ।  

केही समय पहिले अख्तियारले धितोपत्र बोर्डका केही कर्मचारीहरुलाई बोलाएपछि बोर्डका कर्मचारी नयाँ स्टक एक्सचेञ्जको फाइल नै अघि बढाउन तयार नभएका हुन् ।  

यसैगरि धितोपत्र बोर्डमा नयाँ स्टक एक्सचेञ्जको काम अघि नबढ्दा कमोडिटिज बजार पनि लामो देखि अन्यौलमा परेको छ । धितोपत्र बोर्डले २०७३ सालमा नै विनियामली तयार पारेको थियो । तर अहिलेसम्म पनि यस विषयमा केही प्रकृया अघि बढ्न सकेको छैन । ततकालिन बोर्ड अध्यक्ष रमेश कुमार हमालले यस विषयमा केही चासो दिएका थिए । तर स्टक एक्सचेञ्जको काम रोकिएपछि उनी पनि कमोडिटिज बजारलाई अघि बढाउन जागरुक भएनन् ।

हाल नेपालमा लगानीकर्ताहरुलाई इक्विटी खरिद–बिक्री बाहेक अन्य कुनै खरिद बिक्रीको अवसर रहेको छैन । यदि कमोडिटिज बजार कारोबारमा आएमा लगानीकर्ताले सुन, कच्चा तेल , कफी तथा अन्य वस्तुहरुको किनबेच गर्न सम्भव हुने थियो । तर धितोपत्र बोर्डले यस विषयमा खासै कुने पनि प्रक्रिया लामो समयदेखि अगाडि नबढाउँदा लगानीकर्ताहरु इक्विटी बजारमा मात्रै सीमित भएका छन् ।