सुनको मूल्यमा पहिरो, प्रतिऔंस कति पुग्यो भाउ ?

काठमाण्डौ । अन्तर्राष्ट्रिय बजारमा सुनको मूल्यमा पहिरो गएको छ । पछिल्लो कारोबारमा सुनको मूल्य २.११ प्रतिशत अर्थात ६५.३७ डलरले घटेको छ । यो गिरावटसँगै सुनको मूल्य प्रतिऔंस ३ हजार ३७.६५ डलरमा कारोबार भईरहेको छ ।  

कारोबार सत्रमा सुनको मूल्य प्रतिऔंस ३ हजार १५ डलरसम्म घटेको थियो । गत बिहिबार सुनको मूल्य प्रतिऔंस ३ हजार १६७.५७ डलरको किर्तीमानी उचाईमा पुगेको थियो । गत एक सातामा भने सुनको मूल्य १.९ प्रतिशतले घटेको छ ।  

प्राविधिक रुपमा हेर्दा सुनको मूल्य प्रतिऔंस ३ हजार २३ डलरको २१ दिने मुभिङ एभरेजभन्दा माथि नै रहेको छ ।  

निरन्तर वृद्धि भईरहेकाले पछिल्लो समय लगानीकर्ताले नाफा बुक गर्दा सुनको भाउ घटेको छ । चाहेको जुनसुकै बेलापनि बिक्री गर्न सकिने भएकाले सुनलाई उच्च तरल सम्पत्तिको रुपमा लिइने गरेकाले पोर्टफोलियोमा जोखिम बढ्दा लगानीकर्ताले बिक्री बढाउनुलाई अन्यथा लिन नमिल्ने विज्ञहरुले बताएका छन् ।  

डलर इन्डेक्स बढ्दा समेत अन्य मुद्रा भएकाहरुलाई सुनको खरिद महङ्गो पर्न गएको छ ।  

पछिल्लो कारोबारमा चाँदीको भाउमा पनि उच्च गिरावट आएको छ । चाँदी २.२८ डलरले ओरालो लाग्दै प्रतिऔंस २९.६२ डलर कायम भएको छ ।