थामियो सुनको ओरालो यात्रा, एकैदिन ४१ डलरले वृद्धि

काठमाण्डौ । अन्तर्राष्ट्रिय बजारमा सुनको मूल्य फेरि बढ्न थालेको छ । आजको कारोबारमा सुनको मूल्य १.३९ प्रतिशत अर्थात ४१.२९ डलरले बढेको छ । यो वृद्धिसँगै सुनको भाउ प्रतिऔंस ३ हजार ८.४९ डलरमा कारोबार भईरहेको छ । अमेरिका र चीनबीचको व्यापारीक टकराब र अमेरिकाको ट्यारिफ नीतिका कारण सुनको मूल्य पुनःउकालो लागेको हो । यसका साथै आफ्ना प्रतिष्पर्धि मुद्राको तुलनामा डलर केही कमजोर बन्दा समेत सुनको मूल्यमा बढोत्तरी आएको छ । पछिल्लो ३ कारोबारमा भने सुनको मूल्य लगातार घटेको थियो । अमेरिकाले चीनमाथि अतिरिक्त कर थप्दै कुल भन्सार शुल्क १०४ प्रतिशत पुर्याएको छ । आर्थिक र राजनीतिक संकटका बेला सुरक्षित लगानीको रुपमा लिइने सुनको मूल्य यो वर्ष १५ प्रतिशतले बढिसकेको छ । आज चाँदीको मूल्य पनि बढेको छ । चाँदी ०.११ डलरले बढ्दै प्रतिऔंस २९.८९ डलर कायम भएको छ ।